مت پوچھو کچھ اپنی باتیں کہیے تو تم کو ندامت ہو

مت پوچھو کچھ اپنی باتیں کہیے تو تم کو ندامت ہو

قد قامت یہ کچھ ہے تمہارا لیکن قہر قیامت ہو

ربط اخلاص اے دیدہ و دل بھی دنیا میں ایک سے ہوتا ہے

لگ پڑتے ہو جس سے تس سے تم بھی کوئی ملامت ہو

آج سحر ہوتے ہی کچھ خورشید ترے منہ آن چڑھا

روک سکے ہے کون اسے سر جس کے ایسی شامت ہو

چاہ کا دعویٰ سب کرتے ہیں مانیے کیونکر بے آثار

اشک کی سرخی زردی منہ کی عشق کی کچھ تو علامت ہو

سرو و گل اچھے ہیں دونوں رونق ہیں گلزار کی ایک

چاہیے رو اس کا سا رو ہو قامت ویسا قامت ہو

مل بیٹھے اس نائی کے سے کوئی گھڑی جو زاہد تو

جتنے بال ہیں سارے سر میں ویسی ہی اس کی حجامت ہو

ہو جو ارادہ یاں رہنے کا رہ سکیے تو رہیے آپ

ہم تو چلے جاتے ہیں ہر دم کس کو قصد اقامت ہو

کس مدت سے دوری میں تیری خاک رہ سے برابر ہوں

کریے رنجہ قدم ٹک مجھ تک جو کچھ پاس قدامت ہو

منہ پر اس کی تیغ ستم کے سیدھا جانا ٹھہرا ہے

جینا پھر کجدار و مریز اس طور میں ہو ٹک یا مت ہو

شور و شغب کو راتوں کے ہمسائے تمہارے کیا روویں

ایسے فتنے کتنے اٹھیں گے میرؔ جی تم جو سلامت ہو