mazhab se mere kya tujhe mera dayar aur

maz.hab se mere kyā tujhe merā dayār aur

maiñ aur yaar aur mirā kārobār aur

chaltā hai kaam marg kā ḳhuub us ke daur meñ

hotī hai gird shahr ke roz ik mazār aur

bande ko in faqīroñ meñ giniye na shahr ke

sāhab ne mere mujh ko diyā e.atibār aur

dil ko to laag hī hai takūñ raah kab talak

is par hai yak azāb-e-shadīd intizār aur

bismil pasand kar ke taḌapnā na dekhnā

hai mere said-pesha kā taur-e-shikār aur

maiñ us kī gard-e-rah kā rahā muntazir bahut

so āñkheñ donoñ lā.īñ mirī ik ġhubār aur

dard-e-sar ab jo ishq kā hai gor tak hai saath

kuchh ye nasha hī aur hai is kā ḳhumār aur

kaahe ko is qarār se thā iztirāb-e-qalb

hotā hai haath rakhne se dil be-qarār aur

kis ko faqīrī meñ sar-o-dil harf kā hai 'mīr'

karte haiñ is dimāġh pe ham inkisār aur

mazhab se mere kya tujhe mera dayar aur

main aur yar aur mera karobar aur

chalta hai kaam marg ka KHub us ke daur mein

hoti hai gird shahr ke roz ek mazar aur

bande ko in faqiron mein giniye na shahr ke

sahab ne mere mujh ko diya eatibar aur

dil ko to lag hi hai takun rah kab talak

is par hai yak azab-e-shadid intizar aur

bismil pasand kar ke taDapna na dekhna

hai mere said-pesha ka taur-e-shikar aur

main us ki gard-e-rah ka raha muntazir bahut

so aankhen donon lain meri ek ghubar aur

dard-e-sar ab jo ishq ka hai gor tak hai sath

kuchh ye nasha hi aur hai is ka KHumar aur

kahe ko is qarar se tha iztirab-e-qalb

hota hai hath rakhne se dil be-qarar aur

kis ko faqiri mein sar-o-dil harf ka hai 'mir'

karte hain is dimagh pe hum inkisar aur