mere aage na shair nam pawen

mire aage na shā.ir naam pāveñ

qayāmat ko magar arse meñ aaveñ

parī samjhe tujhe vahm-o-gumāñ se

kahāñ tak aur ham ab dil chalāveñ

tire āshiq tire rusvā kahā.e

tire ho kar kah ab kis ke kahāveñ

mizāj apnā ġhayūr az-bas paḌā hai

tire ġham meñ kise ḳhātir meñ lāveñ

phire hai shaiḳh majlis hī meñ raqsāñ

idhar aa nikle to ham bhī nachāveñ

nazar ai abr ab mat aa mabādā

kahīñ merī bhī āñkheñ DabDabāveñ

qadam-bosī talak muḳhtār haiñ ġhair

ziyāda lag chaleñ to sar meñ khāveñ

qaaf

na aaya vo to kyā ham nīm-jāñ bhī

baġhair us ke mile duniyā se jāveñ

chalī hai tū to ai jān-e-alam-nāk

Tuk ik rah jā ki ham ruḳhsat ho aaveñ

chalā maqdūr se ġham 'mīr' aage

zamīñ phaT jaa.e yā-rab ham samāveñ

mere aage na shair nam pawen

qayamat ko magar arse mein aawen

pari samjhe tujhe wahm-o-guman se

kahan tak aur hum ab dil chalawen

tere aashiq tere ruswa kahae

tere ho kar kah ab kis ke kahawen

mizaj apna ghayur az-bas paDa hai

tere gham mein kise KHatir mein lawen

phire hai shaiKH majlis hi mein raqsan

idhar aa nikle to hum bhi nachawen

nazar ai abr ab mat aa mabaada

kahin meri bhi aankhen DabDabawen

qadam-bosi talak muKHtar hain ghair

ziyaada lag chalen to sar mein khawen

qaf

na aaya wo to kya hum nim-jaan bhi

baghair us ke mile duniya se jawen

chali hai tu to ai jaan-e-alam-nak

Tuk ek rah ja ki hum ruKHsat ho aawen

chala maqdur se gham 'mir' aage

zamin phaT jae ya-rab hum samawen