munh kiye udhar zard hue jate hain Dar se subuk-saran

muñh kiye ūdhar zard hue jaate haiñ Dar se subuk-sārāñ

kyoñke haiñge is raste meñ ham se aah girāñ-bārāñ

jī to phaTā dekh ā.īna har lauh-e-mazār kā jāma-numā

phaaḌ girebāñ tang-dilī se tark-e-libās kiyā yārāñ

kī hai imārat dil kī jinhoñ ne un kī binā kuchh rakkhī rahī

aur to ḳhāna-ḳharāb hī dekhe is bastī ke me'mārāñ

maiḳhāne meñ is aalam ke laġhzish par mastoñ kī na jā

sukr meñ aksar dekhe ham ne baḌe baḌe yaañ hushiyārāñ

kyā suthrāo shifā-ḳhāne meñ ishq ke jā kar dekhe haiñ

īdhar ūdhar saiñkaḌoñ hī bar-pusht-e-bām the bīmārāñ

bā'd-e-subūhī ghighyāte ghighyāte bāchheñ phaT bhī ga.iiñ

yā-rab hogī qubūl kabhū bhī duā-e-sub.h-e-gunahgārāñ

ishq meñ ham se tum se khapeñ to khap jāveñ ġham kis ko hai

maare ga.e haiñ is maidāñ meñ kyā dil vaale jigar-dārāñ

munh kiye udhar zard hue jate hain Dar se subuk-saran

kyonke hainge is raste mein hum se aah giran-baran

ji to phaTa dekh aaina har lauh-e-mazar ka jama-numa

phaD gireban tang-dili se tark-e-libas kiya yaran

ki hai imarat dil ki jinhon ne un ki bina kuchh rakkhi rahi

aur to KHana-KHarab hi dekhe is basti ke me'maran

maiKHane mein is aalam ke laghzish par maston ki na ja

sukr mein aksar dekhe hum ne baDe baDe yan hushiyaran

kya suthrao shifa-KHane mein ishq ke ja kar dekhe hain

idhar udhar sainkaDon hi bar-pusht-e-baam the bimaran

ba'd-e-subuhi ghighyate ghighyate bachhen phaT bhi gain

ya-rab hogi qubul kabhu bhi dua-e-subh-e-gunahgaran

ishq mein hum se tum se khapen to khap jawen gham kis ko hai

mare gae hain is maidan mein kya dil wale jigar-daran