munsif jo tu hai kab tain ye dukh uThaiye

munsif jo tū hai kab ta.iiñ ye dukh uThā.iye

kyā kiije merī jaan agar mar na jā.iye

iz.hār-e-rāz-e-ishq kiye bin rahe na ashk

is tifl-e-nā-samajh ko kahāñ tak paḌhā.iye

tum ne jo apne dil se bhulāyā hameñ to kyā

apne ta.iiñ to dil se hamāre bhulā.iye

fikr-e-ma.āsh ya.anī ġham-e-zīst tā-ba-ke

mar jā.iye kahīñ ki Tuk ārām pā.iye

jaate haiñ kaisī kaisī liye dil meñ hasrateñ

Tuk dekhne ko jāñ-ba-laboñ ke bhī aa.iye

loTūñ huuñ jaise ḳhāk-e-chaman par maiñ ai sipahr

gul ko bhī merī ḳhaak pe vūhīñ luTā.iye

hotā nahīñ huuñ hazrat-e-nāseh maiñ be-dimāġh

kar kar ke poch-goī mirī jaan khā.iye

pahuñchā to hogā sam.a-e-mubārak meñ hāl-e-'mīr'

is par bhī jī meñ aave to dil ko lagā.iye

munsif jo tu hai kab tain ye dukh uThaiye

kya kije meri jaan agar mar na jaiye

izhaar-e-raaz-e-ishq kiye bin rahe na ashk

is tifl-e-na-samajh ko kahan tak paDhaiye

tum ne jo apne dil se bhulaya hamein to kya

apne tain to dil se hamare bhulaiye

fikr-e-maash yani gham-e-zist ta-ba-ke

mar jaiye kahin ki Tuk aaram paiye

jate hain kaisi kaisi liye dil mein hasraten

Tuk dekhne ko jaan-ba-labon ke bhi aaiye

loTun hun jaise KHak-e-chaman par main ai sipahr

gul ko bhi meri KHak pe wuhin luTaiye

hota nahin hun hazrat-e-naseh main be-dimagh

kar kar ke poch-goi meri jaan khaiye

pahuncha to hoga sama-e-mubarak mein haal-e-'mir'

is par bhi ji mein aawe to dil ko lagaiye