mushtaq un labon ke hain sab mard-o-zan tamam

mushtāq un laboñ ke haiñ sab mard-o-zan tamām

daftar likhe ga.e na huā par suḳhan tamām

ab chheḌiye jahāñ vahīñ goyā hai dard sab

phoḌā sā ho gayā hai tire ġham meñ tan tamām

aaya thā garm-e-said vo jīdhar se dasht meñ

dekhā udhar hī girte haiñ ab tak hiran tamām

āvāra gard-bād se the ham pa shahr meñ

kyā ḳhaak meñ milā hai ye dīvāna-pan tamām

kyā lutf-e-tan chhupā hai mire tang-posh kā

uglā paḌe hai jaame se us kā badan tamām

us kār-e-dast-basta pe rījhā na mudda.ī

kyūñkar na kaam apnā kare kohkan tamām

ik gul-zamīñ na vaqfe ke qābil nazar paḌī

dekhā ba-rang-e-āb-e-ravāñ ye chaman tamām

nikle haiñ gul ke rang gulistāñ meñ ḳhaak se

ye ve haiñ us ke ishq ke ḳhūnīñ-kafan tamām

tah sāhiboñ kī aa.ī nikal mai-kade ga.e

girvī the ahl-e-saumi'a ke pairahan tamām

maiñ ḳhaak meñ milā na karūñ kis tarah safar

mujh se ġhubār rakhte haiñ ahl-e-vatan tamām

kuchh hind hī meñ 'mīr' nahīñ log jeb-chāk

hai mere reḳhtoñ kā divāna dakan tamām

mushtaq un labon ke hain sab mard-o-zan tamam

daftar likhe gae na hua par suKHan tamam

ab chheDiye jahan wahin goya hai dard sab

phoDa sa ho gaya hai tere gham mein tan tamam

aaya tha garm-e-said wo jidhar se dasht mein

dekha udhar hi girte hain ab tak hiran tamam

aawara gard-baad se the hum pa shahr mein

kya KHak mein mila hai ye diwana-pan tamam

kya lutf-e-tan chhupa hai mere tang-posh ka

ugla paDe hai jame se us ka badan tamam

us kar-e-dast-basta pe rijha na muddai

kyunkar na kaam apna kare kohkan tamam

ek gul-zamin na waqfe ke qabil nazar paDi

dekha ba-rang-e-ab-e-rawan ye chaman tamam

nikle hain gul ke rang gulistan mein KHak se

ye we hain us ke ishq ke KHunin-kafan tamam

tah sahibon ki aai nikal mai-kade gae

girwi the ahl-e-saumi'a ke pairahan tamam

main KHak mein mila na karun kis tarah safar

mujh se ghubar rakhte hain ahl-e-watan tamam

kuchh hind hi mein 'mir' nahin log jeb-chaak

hai mere reKHton ka diwana dakan tamam