mutrib ne paDhi thi ghazal ek mir ki shab ko

mutrib ne paḌhī thī ġhazal ik 'mīr' kī shab ko

majlis meñ bahut vajd kī hālat rahī sab ko

phirte haiñ chunāñche liye ḳhuddām silāte

darveshoñ ke pairāhan-e-sad-chāk-e-qasab ko

kyā vaj.h kaheñ ḳhūñ-shudan-e-dil kī piyāre

dekho to ho ā.īne meñ tum jumbish-e-lab ko

barsoñ ta.iiñ jab ham ne taraddud kiye haiñ tab

pahuñchāyā hai aadam ta.iiñ vā'iz ke nasab ko

hai rahm ko bhī raah dil-e-yār meñ baare

jāgah nahīñ yaañ varna kahīñ us ke ġhazab ko

kyā ham se gunahgār haiñ ye sab jo mue haiñ

kuchh pūchho na us shoḳh kī ranjish ke sabab ko

dil dene se is tarh ke jī kaash ke dete

yuuñ khīñche koī kab ta.iiñ is ranj-o-ta'ab ko

hairat hai ki hai mudda’ī-e-mā’rifat ik ḳhalq

kuchh ham ne to paayā nahīñ ab tak tire Dhab ko

hogā kisū dīvār ke saa.e meñ paḌā 'mīr'

kyā rabt mohabbat se us ārām-talab ko

mutrib ne paDhi thi ghazal ek 'mir' ki shab ko

majlis mein bahut wajd ki haalat rahi sab ko

phirte hain chunanche liye KHuddam silate

darweshon ke pairahan-e-sad-chaak-e-qasab ko

kya wajh kahen KHun-shudan-e-dil ki piyare

dekho to ho aaine mein tum jumbish-e-lab ko

barson tain jab hum ne taraddud kiye hain tab

pahunchaya hai aadam tain wa'iz ke nasab ko

hai rahm ko bhi rah dil-e-yar mein bare

jagah nahin yan warna kahin us ke ghazab ko

kya hum se gunahgar hain ye sab jo mue hain

kuchh puchho na us shoKH ki ranjish ke sabab ko

dil dene se is tarh ke ji kash ke dete

yun khinche koi kab tain is ranj-o-ta'ab ko

hairat hai ki hai mudda’i-e-ma’rifat ek KHalq

kuchh hum ne to paya nahin ab tak tere Dhab ko

hoga kisu diwar ke sae mein paDa 'mir'

kya rabt mohabbat se us aaram-talab ko