na kar shauq-kushton se jaane ki baaten

na kar shauq-kushtoñ se jaane kī bāteñ

nahīñ ātīñ kyā tujh ko aane kī bāteñ

samājat jo kī bos-e-lab par to bolā

nahīñ ḳhuub ye maar khāne kī bāteñ

zabāneñ badalte haiñ har aan ḳhūbāñ

ye sab kuchh haiñ bigḌe zamāne kī bāteñ

nazar jab karo zer-e-lab kuchh kahe hai

kaho yaar ke āstāne kī bāteñ

sahī jaa.e gaalī agar dostī ho

burī bhī bhalī haiñ lagāne kī bāteñ

hameñ dair-o-ka.abe se kyā guftugū hai

chalī jaatī haiñ ye siyāne kī bāteñ

bigaḌ bhī chuke yaar se ham to yaaro

karo kuchh ab us se banāne kī bāteñ

kiyā sair kal maiñ ne dīvān-e-majnūñ

ḳhush aa.iiñ bahut us divāne kī bāteñ

bahut harza-goī kī yaañ 'mīr' sāhib

karo vaañ ke kuchh muñh dikhāne kī bāteñ

na kar shauq-kushton se jaane ki baaten

nahin aatin kya tujh ko aane ki baaten

samajat jo ki bos-e-lab par to bola

nahin KHub ye mar khane ki baaten

zabanen badalte hain har aan KHuban

ye sab kuchh hain bigDe zamane ki baaten

nazar jab karo zer-e-lab kuchh kahe hai

kaho yar ke aastane ki baaten

sahi jae gali agar dosti ho

buri bhi bhali hain lagane ki baaten

hamein dair-o-kabe se kya guftugu hai

chali jati hain ye siyane ki baaten

bigaD bhi chuke yar se hum to yaro

karo kuchh ab us se banane ki baaten

kiya sair kal main ne diwan-e-majnun

KHush aain bahut us diwane ki baaten

bahut harza-goi ki yan 'mir' sahib

karo wan ke kuchh munh dikhane ki baaten