na nikla dusra waisa jahan mein

na niklā dūsrā vaisā jahāñ meñ

vahī ik jins hai is kārvāñ meñ

kiyā muñh band sab kā baat kahte

balā kuchh sehr hai us kī zabāñ meñ

agar vo but na jaane to na jaane

hameñ sab jaane haiñ hindostāñ meñ

nayā ānan-fa-ānan us ko dekhā

judā thī shaan us kī har zamāñ meñ

khiñchī rahtī hai us abrū-e-ḳham se

koī kyā shāḳh niklī hai kamāñ meñ

jabīñ par chiin rahtī hai hamesha

balā kiina hai apne mehrbāñ meñ

nayā hai kyā shagūfa ye ki aksar

rahā hai phuul paḌtā gulsitāñ meñ

koī bijlī kā TukḌā ab talak bhī

paḌā hogā hamāre āshiyāñ meñ

phire hai chhāntā hī ḳhaak ai 'mīr'

havas kyā hai mizāj-e-āsmāñ meñ

na nikla dusra waisa jahan mein

wahi ek jins hai is karwan mein

kiya munh band sab ka baat kahte

bala kuchh sehr hai us ki zaban mein

agar wo but na jaane to na jaane

hamein sab jaane hain hindostan mein

naya aanan-fa-anan us ko dekha

juda thi shan us ki har zaman mein

khinchi rahti hai us abru-e-KHam se

koi kya shaKH nikli hai kaman mein

jabin par chin rahti hai hamesha

bala kina hai apne mehrban mein

naya hai kya shagufa ye ki aksar

raha hai phul paDta gulsitan mein

koi bijli ka TukDa ab talak bhi

paDa hoga hamare aashiyan mein

phire hai chhanta hi KHak ai 'mir'

hawas kya hai mizaj-e-asman mein