نہ نکلا دوسرا ویسا جہاں میں

نہ نکلا دوسرا ویسا جہاں میں

وہی اک جنس ہے اس کارواں میں

کیا منہ بند سب کا بات کہتے

بلا کچھ سحر ہے اس کی زباں میں

اگر وہ بت نہ جانے تو نہ جانے

ہمیں سب جانے ہیں ہندوستاں میں

نیا آناً‌ فآناً اس کو دیکھا

جدا تھی شان اس کی ہر زماں میں

کھنچی رہتی ہے اس ابروئے خم سے

کوئی کیا شاخ نکلی ہے کماں میں

جبیں پر چین رہتی ہے ہمیشہ

بلا کینہ ہے اپنے مہرباں میں

نیا ہے کیا شگوفہ یہ کہ اکثر

رہا ہے پھول پڑتا گلستاں میں

کوئی بجلی کا ٹکڑا اب تلک بھی

پڑا ہوگا ہمارے آشیاں میں

پھرے ہے چھانتا ہی خاک اے میرؔ

ہوس کیا ہے مزاج آسماں میں