nagah jis ko ishq ka aazar ho gaya

nāgāh jis ko 'ishq kā āzār ho gayā

sahl aage us ke murdan-e-dushvār ho gayā

hai husn kyā matā' ki jis ko nazar paḌī

vo jaan bech kar bhī ḳharīdār ho gayā

barsoñ ta.iiñ jahān meñ kyūñkar rahā hai ḳhizr

maiñ chaar din meñ jiine se bezār ho gayā

ham-bistarī bin us kī maiñ sāhab-farāsh huuñ

hijrāñ meñ kuḌhte kuḌhte hī bīmār ho gayā

ham-dām the so chhuT ga.e sab daam ke uThe

thī dil ko mere choT giraftār ho gayā

us kī nigāh-e-mast kā khāyā hī thā fareb

par shaiḳh tarz dekh ke hushiyār ho gayā

kyā muttaqī thā 'mīr' par ā.īn-e-‘ishq meñ

mujrim sā kusht-o-ḳhūñ kā sazā-vār ho gayā

nagah jis ko 'ishq ka aazar ho gaya

sahl aage us ke murdan-e-dushwar ho gaya

hai husn kya mata' ki jis ko nazar paDi

wo jaan bech kar bhi KHaridar ho gaya

barson tain jahan mein kyunkar raha hai KHizr

main chaar din mein jine se bezar ho gaya

ham-bistari bin us ki main sahab-farash hun

hijran mein kuDhte kuDhte hi bimar ho gaya

ham-dam the so chhuT gae sab dam ke uThe

thi dil ko mere choT giraftar ho gaya

us ki nigah-e-mast ka khaya hi tha fareb

par shaiKH tarz dekh ke hushiyar ho gaya

kya muttaqi tha 'mir' par aain-e-‘ishq mein

mujrim sa kusht-o-KHun ka saza-war ho gaya