pand-go mushfiq abas mera nasihat-gar hua

pand-go mushfiq abas merā nasīhat-gar huā

saḳhtiyāñ jo maiñ bahut khīñchīñ so dil patthar huā

gaaḌ kar miTTī meñ rū-e-ijz kyā ham hī muue

ḳhuun us ke rahguzar kī ḳhaak par aksar huā

ab uThā jaatā nahīñ mujh paas phir Tuk baiTh kar

gird us ke jo phirā sar ko mire chakkar huā

kab khubā jaatā thā yuuñ āñkhoñ meñ jaisā sub.h thā

phuul ḳhush-rang aur us ke farsh par bichh kar huā

kyā sunī tum ne nahīñ bad-halī-e-farhād-o-qais

kaun sā bīmār dil kā aaj tak behtar huā

kaun kartā hai taraf mujh āshiq-e-betāb kī

sūrat-e-ḳhush jin ne dekhī us kī so ūdhar huā

jal gayā yāqūt us ke la.al-e-lab jab hil ga.e

gauhar-e-ḳhush-āb andāz-e-suḳhan se tar huā

kyā kahūñ ab ke junūñ meñ ghar kā bhī rahnā gayā

kaam jo mujh se huā so aql se bāhar huā

shab na kartā shor us kūche meñ gar maiñ jāntā

us kī be-ḳhvābī se hangāma mire sar par huā

hove yā-rab un siyah-rū āñkhoñ kā ḳhāna-ḳharāb

yak nazar karte hī mere dil meñ us kā ghar huā

ustuḳhvāñ sab post se siine ke aate haiñ nazar

ishq meñ un nau-ḳhatoñ ke 'mīr' maiñ mistar huā

pand-go mushfiq abas mera nasihat-gar hua

saKHtiyan jo main bahut khinchin so dil patthar hua

gaD kar miTTi mein ru-e-ijz kya hum hi mue

KHun us ke rahguzar ki KHak par aksar hua

ab uTha jata nahin mujh pas phir Tuk baiTh kar

gird us ke jo phira sar ko mere chakkar hua

kab khuba jata tha yun aankhon mein jaisa subh tha

phul KHush-rang aur us ke farsh par bichh kar hua

kya suni tum ne nahin bad-hali-e-farhad-o-qais

kaun sa bimar dil ka aaj tak behtar hua

kaun karta hai taraf mujh aashiq-e-betab ki

surat-e-KHush jin ne dekhi us ki so udhar hua

jal gaya yaqut us ke lal-e-lab jab hil gae

gauhar-e-KHush-ab andaz-e-suKHan se tar hua

kya kahun ab ke junun mein ghar ka bhi rahna gaya

kaam jo mujh se hua so aql se bahar hua

shab na karta shor us kuche mein gar main jaanta

us ki be-KHwabi se hangama mere sar par hua

howe ya-rab un siyah-ru aankhon ka KHana-KHarab

yak nazar karte hi mere dil mein us ka ghar hua

ustuKHwan sab post se sine ke aate hain nazar

ishq mein un nau-KHaton ke 'mir' main mistar hua