phiriye kab tak shahr mein ab su-e-sahra ru kiya

phiriye kab tak shahr meñ ab sū-e-sahrā rū kiyā

kaam apnā is junūñ meñ ham ne bhī yaksū kiyā

ishq ne kyā kyā tasarruf yaañ kiye haiñ āj-kal

chashm ko paanī kiyā sab dil ko sab lohū kiyā

nik.hat-e-ḳhush us ke pinDe kī sī aatī hai mujhe

is sabab gul ko chaman ke der maiñ ne bū kiyā

kaam meñ qudrat ke kuchh bolā nahīñ jaatā hai haa.e

ḳhūb-rū us ko kiyā lekin bahut bad-ḳhū kiyā

jaanā is ārām-gah se hai ba-ainih bas yahī

jaise sote sote īdhar se udhar pahlū kiyā

'uzlatī islām ke kyā kyā phire haiñ jeb-chāk

tū ne maa.il kyoñ udhar ko gosha-e-abrū kiyā

vo utū-kash kā mujhī par kyā hai sargarm-e-jafā

maare talvāroñ ke un ne bahutoñ ko uttū kiyā

haath par rakh haath ab vo do qadam chaltā nahīñ

jin ne bālish ḳhvāb kā barsoñ mirā baazū kiyā

phuul nargis kā liye bhīchak khaḌā thā raah meñ

kis kī chashm-e-pur-fusūñ ne 'mīr' ko jaadū kiyā

phiriye kab tak shahr mein ab su-e-sahra ru kiya

kaam apna is junun mein hum ne bhi yaksu kiya

ishq ne kya kya tasarruf yan kiye hain aaj-kal

chashm ko pani kiya sab dil ko sab lohu kiya

nikhat-e-KHush us ke pinDe ki si aati hai mujhe

is sabab gul ko chaman ke der main ne bu kiya

kaam mein qudrat ke kuchh bola nahin jata hai hae

KHub-ru us ko kiya lekin bahut bad-KHu kiya

jaana is aaram-gah se hai ba-ainih bas yahi

jaise sote sote idhar se udhar pahlu kiya

'uzlati islam ke kya kya phire hain jeb-chaak

tu ne mail kyon udhar ko gosha-e-abru kiya

wo utu-kash ka mujhi par kya hai sargarm-e-jafa

mare talwaron ke un ne bahuton ko uttu kiya

hath par rakh hath ab wo do qadam chalta nahin

jin ne baalish KHwab ka barson mera bazu kiya

phul nargis ka liye bhichak khaDa tha rah mein

kis ki chashm-e-pur-fusun ne 'mir' ko jadu kiya