poshida kya rahe hai qudrat-numai-e-dil

poshīda kyā rahe hai qudrat-numā.ī-e-dil

dekhī na be-sutūñ meñ zor-āzmā.ī-e-dil

hai tiira ye bayābāñ gard-o-ġhubār se sab

de raah kab dikhā.ī be-rahnumā.ī-e-dil

andoh-o-ġham se aksar rahtā huuñ maiñ mukaddar

kyā ḳhaak meñ milī hai merī safā.ī-e-dil

pesh aave koī sūrat muñh moḌte nahīñ ve

ā.īna-sāñ jinheñ hai kuchh āshnā.ī-e-dil

mar to nahīñ gayā maiñ par jī hī jāntā hai

guzre hai shaaq mujh par jaisī judā.ī-e-dil

is dām-gah meñ us ke saare fareb hī haiñ

aatī nahīñ nazar kuchh mujh ko rihā.ī-e-dil

gar rang hai chalā hai var bū hai to havā hai

kah 'mīr' is chaman meñ kis se lagā.iye dil

poshida kya rahe hai qudrat-numai-e-dil

dekhi na be-sutun mein zor-azmai-e-dil

hai tera ye bayaban gard-o-ghubar se sab

de rah kab dikhai be-rahnumai-e-dil

andoh-o-gham se aksar rahta hun main mukaddar

kya KHak mein mili hai meri safai-e-dil

pesh aawe koi surat munh moDte nahin we

aaina-san jinhen hai kuchh aashnai-e-dil

mar to nahin gaya main par ji hi jaanta hai

guzre hai shaq mujh par jaisi judai-e-dil

is dam-gah mein us ke sare fareb hi hain

aati nahin nazar kuchh mujh ko rihai-e-dil

gar rang hai chala hai war bu hai to hawa hai

kah 'mir' is chaman mein kis se lagaiye dil