qayamat tha saman us KHashmagin par

qayāmat thā samāñ us ḳhashmagīñ par

ki talvāreñ chalīñ abrū kī chiiñ par

na dekhā āḳhir us ā.īna-rū ne

nazar se bhī nigāh-e-vāpsīñ par

ga.e din ijz-o-nāla ke ki ab hai

dimāġh-e-nāla charḳh-e-haftumīñ par

huā hai haath guldasta hamārā

ki dāġh-e-ḳhūñ bahut hai āstīñ par

ḳhudā jaane ki kyā ḳhvāhish hai jī ko

nazar apnī nahīñ hai mehr-o-kīñ par

par-afshānī qafas hī kī bahut hai

ki parvāz-e-chaman-qābil nahīñ par

qaaf

jigar meñ apne baaqī rote rote

agarche kuchh nahīñ ai ham-nashīñ par

kabhū jo aañkh se chalte haiñ aañsū

to bhar jaatā hai paanī sab zamīñ par

qadam dasht-e-mohabbat meñ na rakh 'mīr'

ki sar jaatā hai gām-e-avvalīñ par

qayamat tha saman us KHashmagin par

ki talwaren chalin abru ki chin par

na dekha aaKHir us aaina-ru ne

nazar se bhi nigah-e-wapsin par

gae din ijz-o-nala ke ki ab hai

dimagh-e-nala charKH-e-haftumin par

hua hai hath guldasta hamara

ki dagh-e-KHun bahut hai aastin par

KHuda jaane ki kya KHwahish hai ji ko

nazar apni nahin hai mehr-o-kin par

par-afshani qafas hi ki bahut hai

ki parwaz-e-chaman-qabil nahin par

qaf

jigar mein apne baqi rote rote

agarche kuchh nahin ai ham-nashin par

kabhu jo aankh se chalte hain aansu

to bhar jata hai pani sab zamin par

qadam dasht-e-mohabbat mein na rakh 'mir'

ki sar jata hai gam-e-awwalin par