raazi hun go ki baad-az sad-sal-o-mah dekhun

raazī huuñ go ki ba.ad-az sad-sāl-o-māh dekhūñ

aksar nahīñ to tujh ko maiñ gāh-gāh dekhūñ

jī intizār-kash hai āñkhoñ meñ rahguzar par

aa jā nazar ki kab tak maiñ terī raah dekhūñ

āñkheñ jo khul rahī haiñ marne ke baad merī

hasrat ye thī ki us ko maiñ ik nigāh dekhūñ

ye dil vo jā hai jis meñ dekhā thā tujh ko baste

kin āñkhoñ se ab ujḌā is ghar ko aah dekhūñ

dekhūñ to chāñd ab kā guzre hai mujh ko kaisā

dil hai ki tere muñh par be-mehr maah dekhūñ

baḳht-e-siyah to apne rahte haiñ ḳhvāb hī meñ

ai rashk-e-yūsuf-e-misr phir kis ko chaah dekhūñ

chashm-o-dil-o-jigar ye saare hue pareshāñ

kis kis kī tere ġham meñ hālat tabāh dekhūñ

āñkheñ to tū ne dī haiñ ai jurm-baḳhsh-e-ālam

kyā terī rahmat aage apne gunāh dekhūñ

tārīk ho chalā hai āñkhoñ meñ merī aalam

hotā hai kyūñke dil ban merā tabāh dekhūñ

marnā hai yā tamāshā har ik kī hai zabāñ par

is maj.hale ko chal kar maiñ ḳhvā-na-ḳhvāh dekhūñ

dekhūñ huuñ aañkh uThā kar jis ko to ye kahe hai

hotā hai qatl kyūñkar ye be-gunāh dekhūñ

huuñ maiñ nigāh-bismil go ik mizha thī fursat

tā 'mīr' rū-e-qātil tā qatl-gāh dekhūñ

raazi hun go ki baad-az sad-sal-o-mah dekhun

aksar nahin to tujh ko main gah-gah dekhun

ji intizar-kash hai aankhon mein rahguzar par

aa ja nazar ki kab tak main teri rah dekhun

aankhen jo khul rahi hain marne ke baad meri

hasrat ye thi ki us ko main ek nigah dekhun

ye dil wo ja hai jis mein dekha tha tujh ko baste

kin aankhon se ab ujDa is ghar ko aah dekhun

dekhun to chand ab ka guzre hai mujh ko kaisa

dil hai ki tere munh par be-mehr mah dekhun

baKHt-e-siyah to apne rahte hain KHwab hi mein

ai rashk-e-yusuf-e-misr phir kis ko chah dekhun

chashm-o-dil-o-jigar ye sare hue pareshan

kis kis ki tere gham mein haalat tabah dekhun

aankhen to tu ne di hain ai jurm-baKHsh-e-alam

kya teri rahmat aage apne gunah dekhun

tarik ho chala hai aankhon mein meri aalam

hota hai kyunke dil ban mera tabah dekhun

marna hai ya tamasha har ek ki hai zaban par

is majhale ko chal kar main KHwa-na-KHwah dekhun

dekhun hun aankh uTha kar jis ko to ye kahe hai

hota hai qatl kyunkar ye be-gunah dekhun

hun main nigah-bismil go ek mizha thi fursat

ta 'mir' ru-e-qatil ta qatl-gah dekhun