raftar mein ye shoKHi rahm ai jawan zamin par

raftār meñ ye shoḳhī rahm ai javāñ zamīñ par

laatā hai taaza aafat tū har zamāñ zamīñ par

āñkheñ lagī raheñgī barsoñ vahīñ sabhoñ kī

hogā qadam kā tere jis jā nishāñ zamīñ par

maiñ musht-e-ḳhāk yā-rab bār-e-girān-e-ġham thā

kyā kahiye aa paḌā hai ik āsmāñ zamīñ par

āñkheñ hī bichh rahī haiñ logoñ kī terī rah meñ

Tuk dekh kar qadam rakh ai kām-e-jāñ zamīñ par

ḳhāk-e-siyah se yaksāñ har ek hai kahe tū

maarā uThā falak ne saarā jahāñ zamīñ par

chashme kahīñ haiñ joshāñ juueñ kahīñ haiñ jaarī

juuñ abr ham na ro.e us bin kahāñ zamīñ par

aatā na thā faro sar jin kā kal āsmāñ se

haiñ Thokaroñ meñ un ke aaj ustuḳhvāñ zamīñ par

jo koī yaañ se guzrā kyā aap se na guzrā

paanī rahā kab itnā ho kar ravāñ zamīñ par

phir bhī uThā lī sar par tum ne zamīñ sab aa kar

kyā kyā huā thā tum se kuchh aage yaañ zamīñ par

kuchh bhī munāsibat hai yaañ ijz vaañ takabbur

ve āsmān par haiñ maiñ nā-tavāñ zamīñ par

past-o-buland yaañ kā hai aur hī taraf se

apnī nazar nahīñ hai kuchh āsmāñ zamīñ par

qasr-e-jināñ to ham ne dekhā nahīñ jo kahiye

shāyad na hove dil sā koī makāñ zamīñ par

yaañ ḳhaak se unhoñ kī logoñ ne ghar banā.e

āsār haiñ jinhoñ ke ab tak ayaañ zamīñ par

kyā sar jhukā rahe ho 'mīr' is ġhazal ko sun kar

baare nazar karo Tuk ai mehrbāñ zamīñ par

raftar mein ye shoKHi rahm ai jawan zamin par

lata hai taza aafat tu har zaman zamin par

aankhen lagi rahengi barson wahin sabhon ki

hoga qadam ka tere jis ja nishan zamin par

main musht-e-KHak ya-rab bar-e-giran-e-gham tha

kya kahiye aa paDa hai ek aasman zamin par

aankhen hi bichh rahi hain logon ki teri rah mein

Tuk dekh kar qadam rakh ai kaam-e-jaan zamin par

KHak-e-siyah se yaksan har ek hai kahe tu

mara uTha falak ne sara jahan zamin par

chashme kahin hain joshan juen kahin hain jari

jun abr hum na roe us bin kahan zamin par

aata na tha faro sar jin ka kal aasman se

hain Thokaron mein un ke aaj ustuKHwan zamin par

jo koi yan se guzra kya aap se na guzra

pani raha kab itna ho kar rawan zamin par

phir bhi uTha li sar par tum ne zamin sab aa kar

kya kya hua tha tum se kuchh aage yan zamin par

kuchh bhi munasibat hai yan ijz wan takabbur

we aasman par hain main na-tawan zamin par

past-o-buland yan ka hai aur hi taraf se

apni nazar nahin hai kuchh aasman zamin par

qasr-e-jinan to hum ne dekha nahin jo kahiye

shayad na howe dil sa koi makan zamin par

yan KHak se unhon ki logon ne ghar banae

aasar hain jinhon ke ab tak ayan zamin par

kya sar jhuka rahe ho 'mir' is ghazal ko sun kar

bare nazar karo Tuk ai mehrban zamin par