rahne ka pas nahin ek bhi tar aaKHir-e-kar

rahne kā paas nahīñ ek bhī taar āḳhir-e-kār

haath se jā.egā sar-rishta-e-kār āḳhir-e-kār

lauh-e-turbat pe mirī pahle ye likhyo ki ise

yaar dushman ho gayā jaan se maar āḳhir-e-kār

musht-e-ḳhāk apnī jo pāmāl hai yaañ is pe na jā

sar ko khīñchegā falak tak ye ġhubār āḳhir-e-kār

sair kar kasrat-e-‘ālam kī mirī jaan ki phir

tan-e-tanhā hai tū aur kunj-e-mazār āḳhir-e-kār

chashm vā dekh ke is baaġh meñ kiijo nargis

āñkhoñ se jaatī rahegī ye bahār āḳhir-e-kār

ibtidā hī meñ mohabbat kī hue ham to tamām

hotā hogā yahī kuchh 'ishq meñ yaar āḳhir-e-kār

avval-e-kār-e-mohabbat to bahut sahl hai 'mīr'

jī se jaatā hai vale sabr-o-qarār āḳhir-e-kār

rahne ka pas nahin ek bhi tar aaKHir-e-kar

hath se jaega sar-rishta-e-kar aaKHir-e-kar

lauh-e-turbat pe meri pahle ye likhyo ki ise

yar dushman ho gaya jaan se mar aaKHir-e-kar

musht-e-KHak apni jo pamal hai yan is pe na ja

sar ko khinchega falak tak ye ghubar aaKHir-e-kar

sair kar kasrat-e-‘alam ki meri jaan ki phir

tan-e-tanha hai tu aur kunj-e-mazar aaKHir-e-kar

chashm wa dekh ke is bagh mein kijo nargis

aankhon se jati rahegi ye bahaar aaKHir-e-kar

ibtida hi mein mohabbat ki hue hum to tamam

hota hoga yahi kuchh 'ishq mein yar aaKHir-e-kar

awwal-e-kar-e-mohabbat to bahut sahl hai 'mir'

ji se jata hai wale sabr-o-qarar aaKHir-e-kar