rakho mat sar chaDhae dilbaron ke gundhe baalon ko

rakho mat sar chaḌhā.e dilbaroñ ke gūñdhe bāloñ ko

khilānā kholnā mushkil bahut hai aise kāloñ ko

uḌāyā ġham ne un ke sūkhe pattoñ kī ravish ham ko

ilāhī sabz rakhiyo bāġh-e-ḳhūbī ke nihāloñ ko

jahāñ dekho kahā karte haiñ us ke ishq ke ġham meñ

na ham do-chār baiThe dil-shikaste apne hāloñ ko

na chashm-e-kam se mujh darvesh kī āvārgī dekho

tabarruk karte haiñ kāñTe mire paañv ke chhāloñ ko

kare hai jis pe bulbul ġhash so ye us jins kī qīmat

nahīñ afsos āñkheñ be-haqīqat phuul vāloñ ko

dil-e-āshiq ko rū kyā jānūñ ḳhūbāñ kyoñ nahīñ dete

bahut ā.īne se to rabt hai sāhib-jamāloñ ko

yahī kuchh vahm sī hai sahl kab aa.e qayāsoñ meñ

tafakkur us kamar kā khā gayā nāzuk-ḳhayāloñ ko

na aisī tarz-e-dīdan hai na hirnoñ kī ye chitvan hai

kabhū jangal meñ le chaliyegā in shahrī ġhazāloñ ko

koī bhī is tarah se apne jī par khel jaatā hai

magar bāzīcha samjhe 'mīr' ishq-e-ḳhurd-sāloñ ko

rakho mat sar chaDhae dilbaron ke gundhe baalon ko

khilana kholna mushkil bahut hai aise kalon ko

uDaya gham ne un ke sukhe patton ki rawish hum ko

ilahi sabz rakhiyo bagh-e-KHubi ke nihaalon ko

jahan dekho kaha karte hain us ke ishq ke gham mein

na hum do-chaar baiThe dil-shikaste apne haalon ko

na chashm-e-kam se mujh darwesh ki aawargi dekho

tabarruk karte hain kanTe mere panw ke chhaalon ko

kare hai jis pe bulbul ghash so ye us jins ki qimat

nahin afsos aankhen be-haqiqat phul walon ko

dil-e-ashiq ko ru kya jaanun KHuban kyon nahin dete

bahut aaine se to rabt hai sahib-jamalon ko

yahi kuchh wahm si hai sahl kab aae qayason mein

tafakkur us kamar ka kha gaya nazuk-KHayalon ko

na aisi tarz-e-didan hai na hirnon ki ye chitwan hai

kabhu jangal mein le chaliyega in shahri ghazalon ko

koi bhi is tarah se apne ji par khel jata hai

magar bazicha samjhe 'mir' ishq-e-KHurd-salon ko