rasate ho aate ho ahl-e-hawas mein

rasāte ho aate ho ahl-e-havas meñ

maza ras meñ hai loge kyā tum kuras meñ

darā meñ kahāñ shor aisā dharā thā

kisū kā magar dil rakhā thā jaras meñ

hameñ ishq meñ bekasī bebasī hai

na dushman bhī ho dostī ke to bas meñ

na rah mutma.in tasma-bāz-e-falak se

daġhā se ye bahutoñ ke khīñche hai tasmeñ

bahut ro.e parde meñ jab dīda-e-tar

huī achchhī barsāt tab is baras meñ

tan-e-zard-o-lāġhar meñ zāhir rageñ haiñ

bharā hai magar ishq ik ek nas meñ

mohabbat vafā mahr karte the bāham

uThā dī haiñ ve tum ne ab saarī rasmeñ

tumheñ rabt logoñ se har qism ke hai

na khāyā karo jhūTī jhūTī to qasmeñ

havā hī ko dekheñ haiñ ai 'mīr' asīrāñ

lagā deñ magar āñkheñ chāk-e-qafas meñ

rasate ho aate ho ahl-e-hawas mein

maza ras mein hai loge kya tum kuras mein

dara mein kahan shor aisa dhara tha

kisu ka magar dil rakha tha jaras mein

hamein ishq mein bekasi bebasi hai

na dushman bhi ho dosti ke to bas mein

na rah mutmain tasma-baz-e-falak se

dagha se ye bahuton ke khinche hai tasmen

bahut roe parde mein jab dida-e-tar

hui achchhi barsat tab is baras mein

tan-e-zard-o-laghar mein zahir ragen hain

bhara hai magar ishq ek ek nas mein

mohabbat wafa mahr karte the baham

uTha di hain we tum ne ab sari rasmen

tumhein rabt logon se har qism ke hai

na khaya karo jhuTi jhuTi to qasmen

hawa hi ko dekhen hain ai 'mir' asiran

laga den magar aankhen chaak-e-qafas mein