riha hona nahin imkan in tarkib walon se

rihā honā nahīñ imkān in tarkīb vāloñ se

ki bal de bāñdhte haiñ pech pagḌī ke bhī bāloñ se

tujhe nisbat jo dete haiñ sharār-o-barq-o-sho.ale se

tasallī karte haiñ nā-chār shā.ir in misāloñ se

balā kā shukr kar ai dil ki ab ma.alūm hotī hai

haqīqat āfiyat kī is galī ke rahne vāloñ se

nahīñ ai ham-nafas ab jī meñ tāqat dūrī-e-gul kī

jigar TukḌe huā jaatā hai āḳhir shab ke nāloñ se

nahīñ ḳhālī asar se tasfiya dil kā mohabbat meñ

ki ā.īne ko rabt-e-ḳhās hai sāhib-jamāloñ se

kahāñ ye qāmat-e-dilkash kahāñ pākīzgī aisī

mile haiñ ham bahut gulzār ke nāzuk nihāloñ se

hadaf us kā hue muddat huī siine ko par ab tak

guthā nikle hai laḳht-e-dil mirā tīroñ ke bhāloñ se

huā pīrāna-sar āshiq ho zāhid maz.haka sab kā

kuhan-sālī meñ miltā hai koī bhī ḳhurd-sāloñ se

rag-e-gul koī kahtā hai koī ai 'mīr' mū us ko

kamar us shoḳh kī bañdhtī nahīñ in ḳhush-ḳhayāloñ se

riha hona nahin imkan in tarkib walon se

ki bal de bandhte hain pech pagDi ke bhi baalon se

tujhe nisbat jo dete hain sharar-o-barq-o-shoale se

tasalli karte hain na-chaar shair in misalon se

bala ka shukr kar ai dil ki ab malum hoti hai

haqiqat aafiyat ki is gali ke rahne walon se

nahin ai ham-nafas ab ji mein taqat duri-e-gul ki

jigar TukDe hua jata hai aaKHir shab ke nalon se

nahin KHali asar se tasfiya dil ka mohabbat mein

ki aaine ko rabt-e-KHas hai sahib-jamalon se

kahan ye qamat-e-dilkash kahan pakizgi aisi

mile hain hum bahut gulzar ke nazuk nihaalon se

hadaf us ka hue muddat hui sine ko par ab tak

gutha nikle hai laKHt-e-dil mera tiron ke bhaalon se

hua pirana-sar aashiq ho zahid mazhaka sab ka

kuhan-sali mein milta hai koi bhi KHurd-salon se

rag-e-gul koi kahta hai koi ai 'mir' mu us ko

kamar us shoKH ki bandhti nahin in KHush-KHayalon se