rishta kya Thahrega ye jaise ki mu nazuk hai

rishta kyā Thahregā ye jaise ki mū nāzuk hai

chāk-e-dil palkoñ se mat sī ki rafū nāzuk hai

shāḳh-e-gul kaahe ko is lutf se lachke hai kahīñ

laag vaalā koī dekhe tujhe tū nāzuk hai

chashm-e-insāf se burqe ko uThā dekho use

gul ke muñh se to ka.ī parda vo rū nāzuk hai

lutf kyā deve tumheñ naqsh-e-hasīr-e-darvesh

boriyā-poshoñ se pūchho ye utū nāzuk hai

biiḌe khātā hai to aatā hai nazar paan kā rang

kis qadar haa.e re vo jild-e-gulū nāzuk hai

gul samajh kar na kahīñ bekalī karne lagiyo

bulbul us lāla-e-ḳhush-rang kī ḳhū nāzuk hai

rakkhe tā-chand ḳhayāl us sar-e-pur-shor kā 'mīr'

dil to kāñpā hī kare hai ki subū nāzuk hai

rishta kya Thahrega ye jaise ki mu nazuk hai

chaak-e-dil palkon se mat si ki rafu nazuk hai

shaKH-e-gul kahe ko is lutf se lachke hai kahin

lag wala koi dekhe tujhe tu nazuk hai

chashm-e-insaf se burqe ko uTha dekho use

gul ke munh se to kai parda wo ru nazuk hai

lutf kya dewe tumhein naqsh-e-hasir-e-darwesh

boriya-poshon se puchho ye utu nazuk hai

biDe khata hai to aata hai nazar pan ka rang

kis qadar hae re wo jild-e-gulu nazuk hai

gul samajh kar na kahin bekali karne lagiyo

bulbul us lala-e-KHush-rang ki KHu nazuk hai

rakkhe ta-chand KHayal us sar-e-pur-shor ka 'mir'

dil to kanpa hi kare hai ki subu nazuk hai