رشتہ کیا ٹھہرے گا یہ جیسے کہ مو نازک ہے

رشتہ کیا ٹھہرے گا یہ جیسے کہ مو نازک ہے

چاک دل پلکوں سے مت سی کہ رفو نازک ہے

شاخ گل کاہے کو اس لطف سے لچکے ہے کہیں

لاگ والا کوئی دیکھے تجھے تو نازک ہے

چشم انصاف سے برقع کو اٹھا دیکھو اسے

گل کے منہ سے تو کئی پردہ وہ رو نازک ہے

لطف کیا دیوے تمہیں نقش حصیر درویش

بوریا پوشوں سے پوچھو یہ اتو نازک ہے

بیڑے کھاتا ہے تو آتا ہے نظر پان کا رنگ

کس قدر ہائے رے وہ جلد گلو نازک ہے

گل سمجھ کر نہ کہیں بیکلی کرنے لگیو

بلبل اس لالۂ خوش رنگ کی خو نازک ہے

رکھے تا چند خیال اس سر پر شور کا میرؔ

دل تو کانپا ہی کرے ہے کہ سبو نازک ہے