ro chuka KHun-e-jigar sab ab jigar mein KHun kahan

ro chukā ḳhūn-e-jigar sab ab jigar meñ ḳhuuñ kahāñ

ġham se paanī ho ke kab kā bah gayā maiñ huuñ kahāñ

dast-o-dāman jeb-o-āġhosh apne is laa.eq na the

phuul maiñ is bāġh-e-ḳhūbī se jo luuñ to luuñ kahāñ

āshiq-o-māshūq yaañ āḳhir fasāne ho ga.e

jā-e-girya hai jahāñ lailā kahāñ majnūñ kahāñ

aag barsī tiira aalam ho gayā jaadū se pur

us kī chashm-e-pur-fusūñ ke sāmne afsūñ kahāñ

sair kī rangīñ bayāz-e-bāġh kī ham ne bahut

sarv kā misrā kahāñ vo qāmat-e-mauzūñ kahāñ

kūcha har-yak jā-e-dilkash ālam-e-ḳhākī meñ hai

par kahīñ lagtā nahīñ jī haa.e maiñ dil duuñ kahāñ

ek dam se qais ke jangal bharā rahtā thā kyā

ab ga.e par us ke vaisī raunaq-e-hāmūñ kahāñ

nāseh-e-mushfiq to kahtā thā ki us se mat mile

par samajhtā hai hamārā ye dil-e-mahzūñ kahāñ

baav ke ghoḌe pe the us baaġh ke sākin savār

ab kahāñ farhād-o-shīrīñ ḳhusrav-e-gul-gūñ kahāñ

khā gayā andoh mujh ko dostān-e-rafta kā

DhūñDhtā hai jī bahut par ab unheñ pā.ūñ kahāñ

thā vo fitna milne kī guuñ kab kisī darvesh ke

kyā kaheñ ham 'mīr' sāhib se hue maftūñ kahāñ

ro chuka KHun-e-jigar sab ab jigar mein KHun kahan

gham se pani ho ke kab ka bah gaya main hun kahan

dast-o-daman jeb-o-aghosh apne is laeq na the

phul main is bagh-e-KHubi se jo lun to lun kahan

aashiq-o-mashuq yan aaKHir fasane ho gae

ja-e-girya hai jahan laila kahan majnun kahan

aag barsi tera aalam ho gaya jadu se pur

us ki chashm-e-pur-fusun ke samne afsun kahan

sair ki rangin bayaz-e-bagh ki hum ne bahut

sarw ka misra kahan wo qamat-e-mauzun kahan

kucha har-yak ja-e-dilkash aalam-e-KHaki mein hai

par kahin lagta nahin ji hae main dil dun kahan

ek dam se qais ke jangal bhara rahta tha kya

ab gae par us ke waisi raunaq-e-hamun kahan

naseh-e-mushfiq to kahta tha ki us se mat mile

par samajhta hai hamara ye dil-e-mahzun kahan

baw ke ghoDe pe the us bagh ke sakin sawar

ab kahan farhad-o-shirin KHusraw-e-gul-gun kahan

kha gaya andoh mujh ko dostan-e-rafta ka

DhunDhta hai ji bahut par ab unhen paun kahan

tha wo fitna milne ki gun kab kisi darwesh ke

kya kahen hum 'mir' sahib se hue maftun kahan