rozon mein rah sakenge hum be-sharab kyunkar

rozoñ meñ rah sakeñge ham be-sharāb kyūñkar

guzregā ittiqā meñ 'ahd-e-shabāb kyūñkar

thoḌe se paanī meñ bhī chal nikle hai aphartā

be-tah hai sar na khīñche ik dam hubāb kyūñkar

chashme buhaire ab tak haiñ yādgār us ke

vo suukh sab ga.ī hai chashm-e-pur-āb kyūñkar

dil kī taraf kā pahlū sab muttasil jale hai

maḳhmal ho farsh kyoñ na āvegī ḳhvāb kyūñkar

avval sahūr khānā āḳhir subūhī karnā

aave na is 'amal se sharm-o-hijāb kyūñkar

ujḌe nagar ko dil ke dekhūñ huuñ jab kahūñ huuñ

ab phir basegī aisī bastī ḳharāb kyūñkar

jurm-o-zunūb to haiñ behadd-o-hasr yārab

roz-e-hisāb leñge mujh se hisāb kyūñkar

pesh-az-sahar uThe hai aaj us ke muñh kā parda

niklegā us taraf se ab āftāb kyūñkar

ḳhat 'mīr' aave jaave jo nikle raah udhar kī

nibhtā nahīñ hai qāsid laave javāb kyūñkar

rozon mein rah sakenge hum be-sharab kyunkar

guzrega ittiqa mein 'ahd-e-shabab kyunkar

thoDe se pani mein bhi chal nikle hai apharta

be-tah hai sar na khinche ek dam hubab kyunkar

chashme buhaire ab tak hain yaadgar us ke

wo sukh sab gai hai chashm-e-pur-ab kyunkar

dil ki taraf ka pahlu sab muttasil jale hai

maKHmal ho farsh kyon na aawegi KHwab kyunkar

awwal sahur khana aaKHir subuhi karna

aawe na is 'amal se sharm-o-hijab kyunkar

ujDe nagar ko dil ke dekhun hun jab kahun hun

ab phir basegi aisi basti KHarab kyunkar

jurm-o-zunub to hain behadd-o-hasr yarab

roz-e-hisab lenge mujh se hisab kyunkar

pesh-az-sahar uThe hai aaj us ke munh ka parda

niklega us taraf se ab aaftab kyunkar

KHat 'mir' aawe jawe jo nikle rah udhar ki

nibhta nahin hai qasid lawe jawab kyunkar