روزوں میں رہ سکیں گے ہم بے شراب کیونکر

روزوں میں رہ سکیں گے ہم بے شراب کیونکر

گزرے گا اتقا میں عہد شباب کیونکر

تھوڑے سے پانی میں بھی چل نکلے ہے اپھرتا

بے تہہ ہے سر نہ کھینچے اک دم حباب کیونکر

چشمے بحیرے اب تک ہیں یادگار اس کے

وہ سوکھ سب گئی ہے چشم پر آب کیونکر

دل کی طرف کا پہلو سب متصل جلے ہے

مخمل ہو فرش کیوں نہ آوے گی خواب کیونکر

اول سحور کھانا آخر صبوحی کرنا

آوے نہ اس عمل سے شرم و حجاب کیونکر

اجڑے نگر کو دل کے دیکھوں ہوں جب کہوں ہوں

اب پھر بسے گی ایسی بستی خراب کیونکر

جرم و ذنوب تو ہیں بے حد و حصر یا رب

روز حساب لیں گے مجھ سے حساب کیونکر

پیش از سحر اٹھے ہے آج اس کے منہ کا پردہ

نکلے گا اس طرف سے اب آفتاب کیونکر

خط میرؔ آوے جاوے جو نکلے راہ ادھر کی

نبھتا نہیں ہے قاصد لاوے جواب کیونکر