sar se aisi lagi hai ab ki jale jate hain

sar se aisī lagī hai ab ki jale jaate haiñ

muttasil sham.a se rote haiñ gale jaate haiñ

is gulistāñ meñ numūd apnī hai juuñ āb-e-ravāñ

dam-ba-dam martabe se apne chale jaate haiñ

tan-badan hijr meñ kyā kahiye ki kaisā sūkhā

halkī bhī baav meñ tinke se hale jaate haiñ

rahte dikhlā.ī nahīñ dete balā-kash us ke

jī khape jaate haiñ dil apne dale jaate haiñ

phir ba-ḳhud aa.e na bad-halī meñ be-ḳhud jo hue

aap se jaate haiñ ham bhī to bhale jaate haiñ

ḳhāk-e-pā us kī hai shāyad kisū kā surma-e-chashm

ḳhaak meñ ahl-e-nazar us se rale jaate haiñ

garm haiñ us kī taraf jaane ko ham lekin 'mīr'

har qadam zo.af-e-mohabbat se Dhale jaate haiñ

sar se aisi lagi hai ab ki jale jate hain

muttasil shama se rote hain gale jate hain

is gulistan mein numud apni hai jun aab-e-rawan

dam-ba-dam martabe se apne chale jate hain

tan-badan hijr mein kya kahiye ki kaisa sukha

halki bhi baw mein tinke se hale jate hain

rahte dikhlai nahin dete bala-kash us ke

ji khape jate hain dil apne dale jate hain

phir ba-KHud aae na bad-hali mein be-KHud jo hue

aap se jate hain hum bhi to bhale jate hain

KHak-e-pa us ki hai shayad kisu ka surma-e-chashm

KHak mein ahl-e-nazar us se rale jate hain

garm hain us ki taraf jaane ko hum lekin 'mir'

har qadam zoaf-e-mohabbat se Dhale jate hain