sau zulm ke rahte hain saza-war hamesha

sau zulm ke rahte haiñ sazā-vār hamesha

ham be-gunāh us ke haiñ gunahgār hamesha

ek aan guzar jaa.e to kahne meñ kuchh aave

darpesh hai yaañ murdan-e-dushvār hamesha

dushman ko na kyoñ sharb-e-mudām aave mayassar

rahtī hai udhar hī nigah-e-yār hamesha

yūsuf se ka.ī aan ke tere sar-e-bāzār

bik jaate haiñ bātoñ meñ ḳharīdār hamesha

hai dāman-e-gul-chīñ chaman-e-jeb hamārā

duniyā meñ rahe dīda-e-ḳhūñ-bār hamesha

jo bin tire dekhe muā dozaḳh meñ hai ya.anī

rahtī hai use hasrat-e-dīdār hamesha

jiinā hai to be-tāqatī-o-be-ḳhudī hai 'mīr'

murda hai ġharaz ishq kā bīmār hamesha

sau zulm ke rahte hain saza-war hamesha

hum be-gunah us ke hain gunahgar hamesha

ek aan guzar jae to kahne mein kuchh aawe

darpesh hai yan murdan-e-dushwar hamesha

dushman ko na kyon sharb-e-mudam aawe mayassar

rahti hai udhar hi nigah-e-yar hamesha

yusuf se kai aan ke tere sar-e-bazar

bik jate hain baaton mein KHaridar hamesha

hai daman-e-gul-chin chaman-e-jeb hamara

duniya mein rahe dida-e-KHun-bar hamesha

jo bin tere dekhe mua dozaKH mein hai yani

rahti hai use hasrat-e-didar hamesha

jina hai to be-taqati-o-be-KHudi hai 'mir'

murda hai gharaz ishq ka bimar hamesha