shayad jigar hararat-e-ishqi se jal gaya

shāyad jigar hararat-e-ishqi se jal gayā

kal dard-e-dil kahā so mirā muñh ubal gayā

be-yār haif baaġh meñ dil Tuk bahal gayā

de gul ko aag chaar taraf maiñ na jal gayā

us āhū-e-ramīda kī shoḳhī kaheñ so kyā

dikhlā.ī de gayā to chhalāvā sā chhal gayā

din-rāt ḳhuuñ kiyā hī kiye ham jigar ko phir

gar phuul gul se koī ghaḌī jī bahal gayā

tevar badalne se to nahīñ us ke be-havās

andesha ye hai taur hī us kā badal gayā

har-chand maiñ ne shauq ko pinhāñ kiyā vale

ek aadh harf pyaar kā muñh se nikal gayā

karte haiñ nazr ham ki na ulfat kareñ kahīñ

gar dil za.iif ab ke hamārā sañbhal gayā

chalne lage the rāh-e-talab par hazār shukr

pahle qadam hī paañv hamārā bichal gayā

maiñ dah-dila to aage hī thā fart-e-shauq se

taur us kā dekh aur bhī kuchh dil dahal gayā

sar ab lage jhukāne bahut ḳhaak kī taraf

shāyad ki 'mīr' jī kā dimāġhī ḳhalal gayā

shayad jigar hararat-e-ishqi se jal gaya

kal dard-e-dil kaha so mera munh ubal gaya

be-yar haif bagh mein dil Tuk bahal gaya

de gul ko aag chaar taraf main na jal gaya

us aahu-e-ramida ki shoKHi kahen so kya

dikhlai de gaya to chhalawa sa chhal gaya

din-raat KHun kiya hi kiye hum jigar ko phir

gar phul gul se koi ghaDi ji bahal gaya

tewar badalne se to nahin us ke be-hawas

andesha ye hai taur hi us ka badal gaya

har-chand main ne shauq ko pinhan kiya wale

ek aadh harf pyar ka munh se nikal gaya

karte hain nazr hum ki na ulfat karen kahin

gar dil zaif ab ke hamara sanbhal gaya

chalne lage the rah-e-talab par hazar shukr

pahle qadam hi panw hamara bichal gaya

main dah-dila to aage hi tha fart-e-shauq se

taur us ka dekh aur bhi kuchh dil dahal gaya

sar ab lage jhukane bahut KHak ki taraf

shayad ki 'mir' ji ka dimaghi KHalal gaya