shab gae the bagh mein hum zulm ke mare hue

shab ga.e the baaġh meñ ham zulm ke maare hue

jaan ko apnī gul-e-mahtāb angāre hue

gor par merī pas-az-muddat qadam-ranja kiyā

ḳhaak meñ mujh ko milā kar mehrbāñ baare hue

āstīneñ rakhte rakhte dīda-e-ḳhūñ-bār par

halq-e-bismil kī tarah lohū ke favvāre hue

va.ade haiñ saare ḳhilāfī harf haiñ yaksar fareb

tum laḌakpan meñ kahāñ se aise 'ayyāre hue

phirte phirte āqibat āñkheñ hamārī muñd ga.iiñ

so ga.e behosh the ham raah ke haare hue

pyaar karne kā jo ḳhūbāñ ham pe rakhte haiñ gunāh

un se bhī to pūchhte tum itne kyoñ pyāre hue

tum jo ham se mil chale Tuk rashk sab karne lage

mehrbāñ jitne the apne mudda.ī saare hue

aaj mere ḳhuun par isrār har dam hai tumheñ

aa.e ho kyā jāniye tum kis ke sankāre hue

lete karvaT hil ga.e jo kaan ke motī tire

sharm se sar-dar-garebāñ sub.h ke taare hue

ustuḳhvāñ hī rah ga.e the yaañ dam-e-ḳhūñ-rez 'mīr'

dāñte paḌ kar nīmche us shoḳh ke aare hue

shab gae the bagh mein hum zulm ke mare hue

jaan ko apni gul-e-mahtab angare hue

gor par meri pas-az-muddat qadam-ranja kiya

KHak mein mujh ko mila kar mehrban bare hue

aastinen rakhte rakhte dida-e-KHun-bar par

halq-e-bismil ki tarah lohu ke fawware hue

wade hain sare KHilafi harf hain yaksar fareb

tum laDakpan mein kahan se aise 'ayyare hue

phirte phirte aaqibat aankhen hamari mund gain

so gae behosh the hum rah ke haare hue

pyar karne ka jo KHuban hum pe rakhte hain gunah

un se bhi to puchhte tum itne kyon pyare hue

tum jo hum se mil chale Tuk rashk sab karne lage

mehrban jitne the apne muddai sare hue

aaj mere KHun par israr har dam hai tumhein

aae ho kya jaaniye tum kis ke sankare hue

lete karwaT hil gae jo kan ke moti tere

sharm se sar-dar-gareban subh ke tare hue

ustuKHwan hi rah gae the yan dam-e-KHun-rez 'mir'

dante paD kar nimche us shoKH ke aare hue