shaiKH-e-haram se laD ke chala hun ab kabe mein na aaunga

shaiḳh-e-haram se laḌ ke chalā huuñ ab ka.abe meñ na ā.ūñgā

tā-but-ḳhāna har-qadam-ūpar sajda kartā jā.ūñgā

bahr-e-parastish pesh-e-sanam hāthoñ se qissīs rahbāñ ke

rishta-e-sub.ha tuḌā.ūñgā zunnār gale se bañdhā.ūñgā

rūd-e-dair ke paanī se yā āb-e-chāh se us jā ke

vāste tā.at-e-kufr ke maiñ donoñ vaqt nahā.ūñgā

taa.ef rasta ka.abe kā jo koī mujh se pūchhegā

jānib-e-dair ishārat kar maiñ raah udhar kī bhulā.ūñgā

be-dīñ ab jo huā so huā huuñ tauf-e-haram se kyā mujh ko

ġhair-az-sū-e-sanam-ḳhāna maiñ rū na udhar ko lā.ūñgā

aage musāfir 'mīr' arab meñ aur ajam meñ kahte haiñ

ab shahroñ meñ hindustāñ ke kāfir 'mīr' kahā.ūñgā

shaiKH-e-haram se laD ke chala hun ab kabe mein na aaunga

ta-but-KHana har-qadam-upar sajda karta jaunga

bahr-e-parastish pesh-e-sanam hathon se qissis rahban ke

rishta-e-subha tuDaunga zunnar gale se bandhaunga

rud-e-dair ke pani se ya aab-e-chah se us ja ke

waste taat-e-kufr ke main donon waqt nahaunga

taef rasta kabe ka jo koi mujh se puchhega

jaanib-e-dair ishaarat kar main rah udhar ki bhulaunga

be-din ab jo hua so hua hun tauf-e-haram se kya mujh ko

ghair-az-su-e-sanam-KHana main ru na udhar ko launga

aage musafir 'mir' arab mein aur ajam mein kahte hain

ab shahron mein hindustan ke kafir 'mir' kahaunga