sher kuchh maine kahe baalon ki uske yaad mein

sher kuchh maiñ ne kahe bāloñ kī us ke yaad meñ

so ġhazal paḌhte phire haiñ log faizabad meñ

surḳh āñkheñ ḳhashm se kiiñ un ne mujh par sub.h ko

dekhī ye tāsīr shab kī ḳhūñ-chakāñ fariyād meñ

ye tasarruf ishq kā hai sab vagarna zarf kyā

ek aalam ġham samāyā ḳhātir-e-nāshād meñ

ishq kī dīvāngī laa.ī hameñ jangal kī or

varna ham phirte bagūle se na ḳhāk-o-bād meñ

der lagtā hai gale talvār par vo rakh ke haath

ḳhūbiyāñ bhī to bahut haiñ us sitam-ījād meñ

ye binā rahtī sī aatī hai nazar kuchh yaañ mujhe

achchhī hai ta.amīr dil kī is ḳharāb-ābād meñ

'mīr' ham jab.ha-ḳharāshoñ se kisū kā zikr kyā

ve hunar ham meñ haiñ jo the taisha-e-farhād meñ

sher kuchh main ne kahe baalon ki us ke yaad mein

so ghazal paDhte phire hain log faizabad mein

surKH aankhen KHashm se kin un ne mujh par subh ko

dekhi ye tasir shab ki KHun-chakan fariyaad mein

ye tasarruf ishq ka hai sab wagarna zarf kya

ek aalam gham samaya KHatir-e-nashad mein

ishq ki diwangi lai hamein jangal ki or

warna hum phirte bagule se na KHak-o-baad mein

der lagta hai gale talwar par wo rakh ke hath

KHubiyan bhi to bahut hain us sitam-ijad mein

ye bina rahti si aati hai nazar kuchh yan mujhe

achchhi hai tamir dil ki is KHarab-abaad mein

'mir' hum jabha-KHarashon se kisu ka zikr kya

we hunar hum mein hain jo the taisha-e-farhad mein