soz-e-darun se aag lagi hai sare badan mein tab si hai

soz-e-darūñ se aag lagī hai saare badan meñ tab sī hai

tāqat dil kī tamām huī hai jī kī chaal kuDhab sī hai

siine ke zaḳhm numāyāñ rahte chaak kiye sau parda-e-dar

muddat se ye raḳhne paḌe the chhātī phaTī maiñ ab sī hai

pursish-e-hāl kabhū karte haiñ nāz-o-chashm-e-ishārat se

un kī ināyat haal pe mere kyā pūchho ho ġhazab sī hai

god meñ merī rakh detā hai paañv hinā.ī dabne ko

yuuñ pāmāl jo maiñ hotā huuñ mujh ko bhī to dab sī hai

lutf kahāñ vo baat kiye par phuul se jhaḌne lag jāveñ

surḳh kalī bhī gul kī agarche yaar ke la.al-e-lab sī hai

ḳhāna-ḳharāb ho ḳhvāhish-e-dil kā aah nihāyat is ko nahīñ

jaan laboñ par aa.ī hai par to bhī garm-e-talab sī hai

tum kahte ho bosa-talab the shāyad shoḳhī karte hoñ

'mīr' to chup tasvīr se the ye baat unhoñ se ajab sī hai

soz-e-darun se aag lagi hai sare badan mein tab si hai

taqat dil ki tamam hui hai ji ki chaal kuDhab si hai

sine ke zaKHm numayan rahte chaak kiye sau parda-e-dar

muddat se ye raKHne paDe the chhati phaTi main ab si hai

pursish-e-haal kabhu karte hain naz-o-chashm-e-ishaarat se

un ki inayat haal pe mere kya puchho ho ghazab si hai

god mein meri rakh deta hai panw hinai dabne ko

yun pamal jo main hota hun mujh ko bhi to dab si hai

lutf kahan wo baat kiye par phul se jhaDne lag jawen

surKH kali bhi gul ki agarche yar ke lal-e-lab si hai

KHana-KHarab ho KHwahish-e-dil ka aah nihayat is ko nahin

jaan labon par aai hai par to bhi garm-e-talab si hai

tum kahte ho bosa-talab the shayad shoKHi karte hon

'mir' to chup taswir se the ye baat unhon se ajab si hai