suna tumne jo guzra saneha hijran mein yaron par

sunā tum ne jo guzrā sāneha hijrāñ meñ yāroñ par

qayāmat ġham se har saa.at rahī ulfat ke māroñ par

kiyā hai ishq-e-ālam-kush ne kyā suthrāo logoñ kā

nikal chal shahr se bāhar nazar kar Tuk mazāroñ par

taḌap kar garm Tuk juuñ barq ThanDe hote jaate haiñ

basān-e-abr-e-rahmat ro bahut ham be-qarāroñ par

baḌī daulat hai darveshī jo ham-rah ho qanā.at ke

ki arsa tang hai hirs-o-havā se tājdāroñ par

siyāhat ḳhuub mujh ko yaad hai par kī bhī vahshat kī

par apnā paañv phaile dasht ke sar-tez ḳhāroñ par

ga.e farhād-o-majnūñ ho koī to baat bhī pūchheñ

yakāyak kyā balā aa.ī hamāre ġham-gusāroñ par

ga.ī is nā-tavān-e-ishq ke aage se piirī Tal

subuk-rūhī mirī ai 'mīr' bhārī hai hazāroñ par

suna tum ne jo guzra saneha hijran mein yaron par

qayamat gham se har saat rahi ulfat ke maron par

kiya hai ishq-e-alam-kush ne kya suthrao logon ka

nikal chal shahr se bahar nazar kar Tuk mazaron par

taDap kar garm Tuk jun barq ThanDe hote jate hain

basan-e-abr-e-rahmat ro bahut hum be-qararon par

baDi daulat hai darweshi jo ham-rah ho qanaat ke

ki arsa tang hai hirs-o-hawa se tajdaron par

siyahat KHub mujh ko yaad hai par ki bhi wahshat ki

par apna panw phaile dasht ke sar-tez KHaron par

gae farhad-o-majnun ho koi to baat bhi puchhen

yakayak kya bala aai hamare gham-gusaron par

gai is na-tawan-e-ishq ke aage se piri Tal

subuk-ruhi meri ai 'mir' bhaari hai hazaron par