tadbir gham-e-dil ki basti mein na Thahrai

tadbīr ġham-e-dil kī bastī meñ na Thahrā.ī

jangal meñ nikal aa.e kuchh vaañ bhī na ban aa.ī

ḳhvāhish ho jise dil kī dil duuñ use aur sar bhī

maiñ ne to isī dil se tasdī' bahut paa.ī

be-parda na honā thā asrār-e-mohabbat ko

āshiq-kushī hai jab se hai ishq kī rusvā.ī

ghar dil kā bahut chhoTā par jā-e-ta.ajjub hai

aalam ko tamām is meñ kis tarah hai gunjā.ī

ghar-bār luTāyā jab tab vo sahī-qad aaya

maflūk hue ab ham kar ḳharch ye bālā.ī

ḳhūbī se nidān us kī sab sūrateñ yaañ bigḌīñ

vo zulf banī dekhī sab ban ga.e saudā.ī

kyā ohda-barā.ī ho us gul kī do-rangī se

har lahza hai ḳhud-rā.ī har aan hai ra.anā.ī

āshiq kī jise hove kuchh qadr nahīñ paidā

jiitā na rahā ab tak majnūñ hī ko maut aa.ī

āzār bahut khīñche ab 'mīr' tavakkul hai

khīñchī na ga.ī ham se har ek kī mirzā.ī

tadbir gham-e-dil ki basti mein na Thahrai

jangal mein nikal aae kuchh wan bhi na ban aai

KHwahish ho jise dil ki dil dun use aur sar bhi

main ne to isi dil se tasdi' bahut pai

be-parda na hona tha asrar-e-mohabbat ko

aashiq-kushi hai jab se hai ishq ki ruswai

ghar dil ka bahut chhoTa par ja-e-tajjub hai

aalam ko tamam is mein kis tarah hai gunjai

ghar-bar luTaya jab tab wo sahi-qad aaya

mafluk hue ab hum kar KHarch ye baalai

KHubi se nidan us ki sab suraten yan bigDin

wo zulf bani dekhi sab ban gae saudai

kya ohda-barai ho us gul ki do-rangi se

har lahza hai KHud-rai har aan hai ranai

aashiq ki jise howe kuchh qadr nahin paida

jita na raha ab tak majnun hi ko maut aai

aazar bahut khinche ab 'mir' tawakkul hai

khinchi na gai hum se har ek ki mirzai