tapish se raat ki jun tun ke ji sanbhaala hai

tapish se raat kī juuñ tuuñ ke jī sañbhālā hai

nahīñ hai dil koī dushman baġhal meñ paalā hai

hinā se yaar kā panja nahīñ hai gul ke rang

hamāre un ne kalejoñ meñ haath Daalā hai

gayā hai pesh le e.ajāz-e-ishq se farhād

vagarna ḳhas ne kahīñ bhī pahāḌ Taalā hai

sunā hai girya-e-ḳhūnīñ pa ye nahīñ dekhā

lahū kā har ghaḌī āñkhoñ ke aage naala hai

rahe ḳhayāl na kyoñ aise māh-tal.at kā

andhere ghar kā hamāre vahī ujālā hai

diloñ ko kahte haiñ hotī hai raah aapas meñ

tarīq-e-ishq bhī aalam se kuchh nirālā hai

hazār baar ghaḌī bhar meñ 'mīr' marte haiñ

unhoñ ne zindagī kā Dhab nayā nikālā hai

tapish se raat ki jun tun ke ji sanbhaala hai

nahin hai dil koi dushman baghal mein pala hai

hina se yar ka panja nahin hai gul ke rang

hamare un ne kalejon mein hath Dala hai

gaya hai pesh le eajaz-e-ishq se farhad

wagarna KHas ne kahin bhi pahaD Tala hai

suna hai girya-e-KHunin pa ye nahin dekha

lahu ka har ghaDi aankhon ke aage nala hai

rahe KHayal na kyon aise mah-talat ka

andhere ghar ka hamare wahi ujala hai

dilon ko kahte hain hoti hai rah aapas mein

tariq-e-ishq bhi aalam se kuchh nirala hai

hazar bar ghaDi bhar mein 'mir' marte hain

unhon ne zindagi ka Dhab naya nikala hai