tariq-e-ishq mein hai rahnuma dil

tarīq-e-ishq meñ hai rahnumā dil

payambar dil hai qibla dil ḳhudā dil

qayāmat thā muravvat-āshnā dil

mue par bhī mirā us meñ rahā dil

rukā itnā ḳhafā itnā huā thā

ki āḳhir ḳhuun ho ho kar bahā dil

jise maarā use phir kar na dekhā

hamārā turfa zālim se lagā dil

na thī sahl istaqāmat is kī lekin

ḳhirām-e-nāz-e-dilbar le gayā dil

badan meñ us ke thī har jaa.e dilkash

bajā bejā huā hai jā-ba-jā dil

ga.e vahshat se bāġh-o-rāġh meñ the

kahīñ Thahrā na duniyā se uThā dil

asīrī meñ to kuchh vāshud kabhū thī

rahā ġhamgīñ huā jab se rihā dil

hama-tan meñ alam thā so na jaanā

girah ye dard hai pahlū meñ yā dil

ḳhamoshī mujh ko hairat se hai varna

bhare haiñ lab se le kar shikve tā-dil

na pūchhā un se jis bin ḳhuuñ huā sab

na samjhā us ke kiine kī adā dil

huā pazhmurda-o-be-sabr-o-be-tāb

karegā is tarah kab tak vafā dil

huī parvā na vaañ dilbar ko yaañ 'mīr'

uThā kar ho chukā jaur-o-jafā dil

tariq-e-ishq mein hai rahnuma dil

payambar dil hai qibla dil KHuda dil

qayamat tha murawwat-ashna dil

mue par bhi mera us mein raha dil

ruka itna KHafa itna hua tha

ki aaKHir KHun ho ho kar baha dil

jise mara use phir kar na dekha

hamara turfa zalim se laga dil

na thi sahl istaqamat is ki lekin

KHiram-e-naz-e-dilbar le gaya dil

badan mein us ke thi har jae dilkash

baja beja hua hai ja-ba-ja dil

gae wahshat se bagh-o-ragh mein the

kahin Thahra na duniya se uTha dil

asiri mein to kuchh washud kabhu thi

raha ghamgin hua jab se riha dil

hama-tan mein alam tha so na jaana

girah ye dard hai pahlu mein ya dil

KHamoshi mujh ko hairat se hai warna

bhare hain lab se le kar shikwe ta-dil

na puchha un se jis bin KHun hua sab

na samjha us ke kine ki ada dil

hua pazhmurda-o-be-sabr-o-be-tab

karega is tarah kab tak wafa dil

hui parwa na wan dilbar ko yan 'mir'

uTha kar ho chuka jaur-o-jafa dil