Thokar laga ke chalna us rashk-e-mah ko bhi

Thokar lagā ke chalnā us rashk-e-māh ko bhī

ye choT hī rahī hai us rū-siyāh ko bhī

us shāh-e-husn kī kuchh mizhgāñ phirī huī haiñ

ġhamze ne varġhalāyā shāyad sipāh ko bhī

kī umr sarf saarī par gum hai matlab apnā

manzil na pahuñche ham to tai kar ke raah ko bhī

sar phoḌnā hamārā us laḌke par na dekho

Tuk dekho is shikast-e-tarf-e-kulāh ko bhī

kartī nahīñ ḳhalish hī mizhgān-e-yār dil meñ

kāvish rahī hai jī se us kī nigāh ko bhī

ḳhūñ-rezī ke to laagū hote nahīñ yakāyak

pahle to pūchhte haiñ zālim gunāh ko bhī

juuñ ḳhaak se hai yaksāñ merā nihāl-qāmat

pāmāl yuuñ na hote dekhā gayāh ko bhī

har lahza pher lenā āñkhoñ kā ham se kyā hai

manzūr rakhiye kuchh to baare nibāh ko bhī

ḳhvāhish bahut jo ho to kāhish hai jān-o-dil kī

kuchh kam kar in dinoñ meñ ai 'mīr' chaah ko bhī

Thokar laga ke chalna us rashk-e-mah ko bhi

ye choT hi rahi hai us ru-siyah ko bhi

us shah-e-husn ki kuchh mizhgan phiri hui hain

ghamze ne warghalaya shayad sipah ko bhi

ki umr sarf sari par gum hai matlab apna

manzil na pahunche hum to tai kar ke rah ko bhi

sar phoDna hamara us laDke par na dekho

Tuk dekho is shikast-e-tarf-e-kulah ko bhi

karti nahin KHalish hi mizhgan-e-yar dil mein

kawish rahi hai ji se us ki nigah ko bhi

KHun-rezi ke to lagu hote nahin yakayak

pahle to puchhte hain zalim gunah ko bhi

jun KHak se hai yaksan mera nihaal-qamat

pamal yun na hote dekha gayah ko bhi

har lahza pher lena aankhon ka hum se kya hai

manzur rakhiye kuchh to bare nibah ko bhi

KHwahish bahut jo ho to kahish hai jaan-o-dil ki

kuchh kam kar in dinon mein ai 'mir' chah ko bhi