tujh kane baiThe ghuTa jata hai ji

tujh kane baiThe ghuTā jaatā hai jī

kāhisheñ kyā kyā uThā jaatā hai jī

yuuñ to murde se paḌe rahte haiñ ham

par vo aatā hai to aa jaatā hai jī

haa.e us ke sharbatī lab se judā

kuchh batāshā sā ghulā jaatā hai jī

ab ke us kī raah meñ jo ho so ho

yā dab hī aatā hai yā jaatā hai jī

kyā kaheñ tum se ki us sho.ale baġhair

jī hamārā kuchh jalā jaatā hai jī

ishq aadam meñ nahīñ kuchh chhoḌtā

haule haule koī khā jaatā hai jī

uTh chale par us ke ġhash karte haiñ ham

ya.anī saath us ke chalā jaatā hai jī

aa nahīñ phirtā vo marte vaqt bhī

haif hai us meñ rahā jaatā hai jī

rakhte the kyā kyā binā.eñ peshtar

so to ab aaphī Dhahā jaatā hai jī

āsmāñ shāyad vare kuchh aa gayā

raat se kyā kyā rukā jaatā hai jī

kāshke burqā rahe us ruḳh pe 'mīr'

muñh khule us ke chhupā jaatā hai jī

tujh kane baiThe ghuTa jata hai ji

kahishen kya kya uTha jata hai ji

yun to murde se paDe rahte hain hum

par wo aata hai to aa jata hai ji

hae us ke sharbati lab se juda

kuchh batasha sa ghula jata hai ji

ab ke us ki rah mein jo ho so ho

ya dab hi aata hai ya jata hai ji

kya kahen tum se ki us shoale baghair

ji hamara kuchh jala jata hai ji

ishq aadam mein nahin kuchh chhoDta

haule haule koi kha jata hai ji

uTh chale par us ke ghash karte hain hum

yani sath us ke chala jata hai ji

aa nahin phirta wo marte waqt bhi

haif hai us mein raha jata hai ji

rakhte the kya kya binaen peshtar

so to ab aaphi Dhaha jata hai ji

aasman shayad ware kuchh aa gaya

raat se kya kya ruka jata hai ji

kashke burqa rahe us ruKH pe 'mir'

munh khule us ke chhupa jata hai ji