Tuk lutf se mila kar go phir kabhu kabhu ho

Tuk lutf se milā kar go phir kabhū kabhū ho

so tab talak ki mujh ko hijrāñ se tere ḳhū ho

kyā kyā javān ham ne duniyā se jaate dekhe

ai ishq-e-be-muhābā duniyā ho aur tū ho

aise kahoge kuchh to ham chupke ho raheñge

har baat par kahāñ tak aapas meñ guftugū ho

kyā hai javāb zālim pursish ke roz kahiyo

jo rū-siyāh ye bhī vaañ aa ke rū-ba-rū ho

qaaf

pur-ḳhūñ hamāre dil se kitnī hai tū mushābah

shāyad kalī tujhe bhī us gul kī aarzū ho

ḳhat us ke pusht-e-lab kā sākit karegā tujh ko

kahiyo agar tafāvut is meñ ba-qadr-e-mū ho

khole the baal kin ne hangām-e-sub.h apne

aa.ī hai ai sabā tū aisī jo mushk-bū ho

darveshī se bhī apnī nikle hai mīrzā.ī

naqsh-e-hasīr tan par aise haiñ juuñ utū ho

mat iltiyām chāhe phir dil-shikastagāñ se

mumkin nahīñ ki shīsha TuuTā huā rafū ho

kahte ho kāñptā huuñ juuñ bed āshiqī se

tum bhī to 'mīr' sāhib kitne ḳhilāf-go ho

Tuk lutf se mila kar go phir kabhu kabhu ho

so tab talak ki mujh ko hijran se tere KHu ho

kya kya jawan hum ne duniya se jate dekhe

ai ishq-e-be-muhaba duniya ho aur tu ho

aise kahoge kuchh to hum chupke ho rahenge

har baat par kahan tak aapas mein guftugu ho

kya hai jawab zalim pursish ke roz kahiyo

jo ru-siyah ye bhi wan aa ke ru-ba-ru ho

qaf

pur-KHun hamare dil se kitni hai tu mushabah

shayad kali tujhe bhi us gul ki aarzu ho

KHat us ke pusht-e-lab ka sakit karega tujh ko

kahiyo agar tafawut is mein ba-qadr-e-mu ho

khole the baal kin ne hangam-e-subh apne

aai hai ai saba tu aisi jo mushk-bu ho

darweshi se bhi apni nikle hai mirzai

naqsh-e-hasir tan par aise hain jun utu ho

mat iltiyam chahe phir dil-shikastagan se

mumkin nahin ki shisha TuTa hua rafu ho

kahte ho kanpta hun jun bed aashiqi se

tum bhi to 'mir' sahib kitne KHilaf-go ho