Tuk Thaharne de tujhe shoKHi to kuchh Thahraiye

Tuk Thaharne de tujhe shoḳhī to kuchh Thahrā.iye

paikar-e-nāzuk ko tere kyūñke bar meñ lā.iye

sākin-e-dair-o-haram donoñ talāshī haiñ tire

tū ḳhudā jaane kahāñ hai kyūñke tujh ko pā.iye

duur hī se hosh kho detī hai us kī bū-e-ḳhush

aap meñ rahiye to us ke paas bhī Tuk jā.iye

in dinoñ rang aur kuchh hai is dil-e-pur-ḳhūn kā

haq meñ mere aap hī kuchh soch kar farmā.iye

jī hī khap jaatā hai tanz-āmez aise lutf se

hañs ke jab kahtā hai sab meñ aa.iye jī aa.iye

dil ke vīrāñ karne meñ bedād kī hai tū ne haa.e

ḳhush-imārat aise ghar ko is tarah se Dhā.iye

rāt-din ruḳhsār us ke chit chaḌhe rahte haiñ 'mīr'

āftāb-o-māh se dil kab talak bahlā.iye

Tuk Thaharne de tujhe shoKHi to kuchh Thahraiye

paikar-e-nazuk ko tere kyunke bar mein laiye

sakin-e-dair-o-haram donon talashi hain tere

tu KHuda jaane kahan hai kyunke tujh ko paiye

dur hi se hosh kho deti hai us ki bu-e-KHush

aap mein rahiye to us ke pas bhi Tuk jaiye

in dinon rang aur kuchh hai is dil-e-pur-KHun ka

haq mein mere aap hi kuchh soch kar farmaiye

ji hi khap jata hai tanz-amez aise lutf se

hans ke jab kahta hai sab mein aaiye ji aaiye

dil ke viran karne mein bedad ki hai tu ne hae

KHush-imarat aise ghar ko is tarah se Dhaiye

raat-din ruKHsar us ke chit chaDhe rahte hain 'mir'

aaftab-o-mah se dil kab talak bahlaiye