ٹک ٹھہرنے دے تجھے شوخی تو کچھ ٹھہرائیے

ٹک ٹھہرنے دے تجھے شوخی تو کچھ ٹھہرائیے

پیکر نازک کو تیرے کیونکے بر میں لائیے

ساکن دیر و حرم دونوں تلاشی ہیں ترے

تو خدا جانے کہاں ہے کیونکے تجھ کو پائیے

دور ہی سے ہوش کھو دیتی ہے اس کی بوئے خوش

آپ میں رہیے تو اس کے پاس بھی ٹک جائیے

ان دنوں رنگ اور کچھ ہے اس دل پر خون کا

حق میں میرے آپ ہی کچھ سوچ کر فرمائیے

جی ہی کھپ جاتا ہے طنز آمیز ایسے لطف سے

ہنس کے جب کہتا ہے سب میں آئیے جی آئیے

دل کے ویراں کرنے میں بیداد کی ہے تو نے ہائے

خوش عمارت ایسے گھر کو اس طرح سے ڈھائیے

رات دن رخسار اس کے چت چڑھے رہتے ہیں میرؔ

آفتاب و ماہ سے دل کب تلک بہلائیے