tu wo nahin kisu ka tah-e-dil se yar ho

tū vo nahīñ kisū kā tah-e-dil se yaar ho

yā tujh ko dil-shikastoñ se iḳhlās-pyār ho

kyā fikr meñ ho apnī tarahdārī hī kī tum

ham dard-mand logoñ ke bīmār-dār ho

masrūf-e-ehtiyāt rahā karte rāt-din

dene meñ dil ke apnā jo kuchh iḳhtiyār ho

dil meñ kadar se āñdhī sī uThne lagī hai ab

nikle gile kī raah to raf.a-e-ġhubār ho

khā zahr mar raheñ kahīñ kyā zindagī hai ye

zulfeñ tanik chhueñ to hameñ maar maar ho

ai āhuvān-e-ka.aba na aiñDo haram ke gird

khaao kisū kī teġh kisū ke shikār ho

muñh se lagī gulābī huā kuchh shagufta tū

thoḌī sharāb aur bhī pī jo bahār ho

bahtī hai tez jadval-e-teġh-e-jafā-e-yār

ya.anī ki ik hī vaar lage kaam paar ho

chhaḌiyoñ se kar qarār madār us ko lā.iye

jo 'mīr' phir laḌā na kareñ be-qarār ho

tu wo nahin kisu ka tah-e-dil se yar ho

ya tujh ko dil-shikaston se iKHlas-pyar ho

kya fikr mein ho apni tarahdari hi ki tum

hum dard-mand logon ke bimar-dar ho

masruf-e-ehtiyat raha karte raat-din

dene mein dil ke apna jo kuchh iKHtiyar ho

dil mein kadar se aandhi si uThne lagi hai ab

nikle gile ki rah to rafa-e-ghubar ho

kha zahr mar rahen kahin kya zindagi hai ye

zulfen tanik chhuen to hamein mar mar ho

ai aahuwan-e-kaba na ainDo haram ke gird

khao kisu ki tegh kisu ke shikar ho

munh se lagi gulabi hua kuchh shagufta tu

thoDi sharab aur bhi pi jo bahaar ho

bahti hai tez jadwal-e-tegh-e-jafa-e-yar

yani ki ek hi war lage kaam par ho

chhaDiyon se kar qarar madar us ko laiye

jo 'mir' phir laDa na karen be-qarar ho