تو وہ نہیں کسو کا تہ دل سے یار ہو

تو وہ نہیں کسو کا تہ دل سے یار ہو

یا تجھ کو دل شکستوں سے اخلاص پیار ہو

کیا فکر میں ہو اپنی طرحداری ہی کی تم

ہم درد مند لوگوں کے بیمار دار ہو

مصروف احتیاط رہا کرتے رات دن

دینے میں دل کے اپنا جو کچھ اختیار ہو

دل میں کدر سے آندھی سی اٹھنے لگی ہے اب

نکلے گلے کی راہ تو رفع غبار ہو

کھا زہر مر رہیں کہیں کیا زندگی ہے یہ

زلفیں تنک چھوئیں تو ہمیں مار مار ہو

اے آہوان کعبہ نہ اینڈو حرم کے گرد

کھاؤ کسو کی تیغ کسو کے شکار ہو

منہ سے لگی گلابی ہوا کچھ شگفتہ تو

تھوڑی شراب اور بھی پی جو بہار ہو

بہتی ہے تیز جدول تیغ جفائے یار

یعنی کہ اک ہی وار لگے کام پار ہو

چھڑیوں سے کر قرار مدار اس کو لائیے

جو میرؔ پھر لڑا نہ کریں بے قرار ہو