us shoKH se hamein bhi ab yari ho gai hai

us shoḳh se hameñ bhī ab yaarī ho ga.ī hai

sharm añkhḌiyoñ meñ jis kī ayyārī ho ga.ī hai

rotā phirā huuñ barsoñ lohū chaman chaman meñ

kūche meñ us ke yaksar gul-kārī ho ga.ī hai

yakjā aTak ke rahnā hai nā-tamāmī varna

sab meñ vahī haqīqat yaañ saarī ho ga.ī hai

jab ḳhaak ke barābar ham ko kiyā falak ne

tab.a-e-ḳhashin meñ tab kuchh hamvārī ho ga.ī hai

mutlaq asar na dekhā muddat kī āh-o-zārī

ab nāla-o-fuġhāñ se be-zārī ho ga.ī hai

us se do-chār honā aatā nahīñ mayassar

marne meñ is se ham ko nā-chārī ho ga.ī hai

har baar zikr-e-mahshar kyā yaar ke dar uupar

aisī to yaañ qayāmat sau-bārī ho ga.ī hai

andāz-e-shoḳhī us ke aate nahīñ samajh meñ

kuchh apnī bhī tabī.at yaañ aarī ho ga.ī hai

shāhī se kam nahīñ hai darveshī apne haañ to

ab aib kuchh jahāñ meñ nādārī ho ga.ī hai

ham ko to dard-e-dil hai tum zard kyoñ ho aise

kyā 'mīr' jī tumheñ kuchh bīmārī ho ga.ī hai

us shoKH se hamein bhi ab yari ho gai hai

sharm ankhDiyon mein jis ki ayyari ho gai hai

rota phira hun barson lohu chaman chaman mein

kuche mein us ke yaksar gul-kari ho gai hai

yakja aTak ke rahna hai na-tamami warna

sab mein wahi haqiqat yan sari ho gai hai

jab KHak ke barabar hum ko kiya falak ne

taba-e-KHashin mein tab kuchh hamwari ho gai hai

mutlaq asar na dekha muddat ki aah-o-zari

ab nala-o-fughan se be-zari ho gai hai

us se do-chaar hona aata nahin mayassar

marne mein is se hum ko na-chaari ho gai hai

har bar zikr-e-mahshar kya yar ke dar upar

aisi to yan qayamat sau-bari ho gai hai

andaz-e-shoKHi us ke aate nahin samajh mein

kuchh apni bhi tabiat yan aari ho gai hai

shahi se kam nahin hai darweshi apne han to

ab aib kuchh jahan mein nadari ho gai hai

hum ko to dard-e-dil hai tum zard kyon ho aise

kya 'mir' ji tumhein kuchh bimari ho gai hai