us shoKH sitamgar ko kya koi bhala chahe

us shoḳh sitamgar ko kyā koī bhalā chāhe

jo chāhne vaale kā har taur burā chāhe

ka.abe ga.e kyā koī maqsad ko pahuñchtā hai

kyā sa.ī se hotā hai jab tak na ḳhudā chāhe

sau rang kī jab ḳhūbī paate ho isī gul meñ

phir us se koī is bin kuchh chāhe to kyā chāhe

ham ijz se pahuñche haiñ maqsūd kī manzil ko

gah ḳhaak meñ mil jaave jo us se milā chāhe

ho saktī haiñ sadd-e-rah palkeñ kahīñ rone kī

tinkoñ se ruke hai kab dariyā jo bahā chāhe

jab tū ne zabāñ chhoḌī tab kaahe kā sarfa hai

be-sarfa kahe kyoñ na jo kuchh ki kahā chāhe

dil jaave hai juuñ ro ke shabnam ne kahā gul se

ab ham to chale yaañ se rah tū jo rahā chāhe

ḳhat rasm-e-zamāna thī ham ne bhī likhā us ko

tā dil kī likhe kyūñkar āshiq jo likhā chāhe

rang-e-gul o bū-e-gul hote haiñ havā donoñ

kyā qāfila jaatā hai jo tū bhī chalā chāhe

ham 'mīr' tirā marnā kyā chāhte the lekin

rahtā hai hue bin kab jo kuchh ki huā chāhe

us shoKH sitamgar ko kya koi bhala chahe

jo chahne wale ka har taur bura chahe

kabe gae kya koi maqsad ko pahunchta hai

kya sai se hota hai jab tak na KHuda chahe

sau rang ki jab KHubi pate ho isi gul mein

phir us se koi is bin kuchh chahe to kya chahe

hum ijz se pahunche hain maqsud ki manzil ko

gah KHak mein mil jawe jo us se mila chahe

ho sakti hain sadd-e-rah palken kahin rone ki

tinkon se ruke hai kab dariya jo baha chahe

jab tu ne zaban chhoDi tab kahe ka sarfa hai

be-sarfa kahe kyon na jo kuchh ki kaha chahe

dil jawe hai jun ro ke shabnam ne kaha gul se

ab hum to chale yan se rah tu jo raha chahe

KHat rasm-e-zamana thi hum ne bhi likha us ko

ta dil ki likhe kyunkar aashiq jo likha chahe

rang-e-gul o bu-e-gul hote hain hawa donon

kya qafila jata hai jo tu bhi chala chahe

hum 'mir' tera marna kya chahte the lekin

rahta hai hue bin kab jo kuchh ki hua chahe