اس شوخ ستم گر کو کیا کوئی بھلا چاہے

اس شوخ ستم گر کو کیا کوئی بھلا چاہے

جو چاہنے والے کا ہر طور برا چاہے

کعبے گئے کیا کوئی مقصد کو پہنچتا ہے

کیا سعی سے ہوتا ہے جب تک نہ خدا چاہے

سو رنگ کی جب خوبی پاتے ہو اسی گل میں

پھر اس سے کوئی اس بن کچھ چاہے تو کیا چاہے

ہم عجز سے پہنچے ہیں مقصود کی منزل کو

گہہ خاک میں مل جاوے جو اس سے ملا چاہے

ہو سکتی ہیں سد رہ پلکیں کہیں رونے کی

تنکوں سے رکے ہے کب دریا جو بہا چاہے

جب تو نے زباں چھوڑی تب کاہے کا صرفہ ہے

بے صرفہ کہے کیوں نہ جو کچھ کہ کہا چاہے

دل جاوے ہے جوں رو کے شبنم نے کہا گل سے

اب ہم تو چلے یاں سے رہ تو جو رہا چاہے

خط رسم زمانہ تھی ہم نے بھی لکھا اس کو

تا دل کی لکھے کیونکر عاشق جو لکھا چاہے

رنگ گل و بوئے گل ہوتے ہیں ہوا دونوں

کیا قافلہ جاتا ہے جو تو بھی چلا چاہے

ہم میرؔ ترا مرنا کیا چاہتے تھے لیکن

رہتا ہے ہوئے بن کب جو کچھ کہ ہوا چاہے