us suKHan-ras se agar shab ki mulaqat rahe

us suḳhan-ras se agar shab kī mulāqāt rahe

baat rah jaa.e na ye din raheñ nai raat rahe

faḳhr se ham to kulāh apnī falak par pheñkeñ

us ke sag se jo mulāqāt musāvāt rahe

muġhbache le ga.e sajjāda-o-ammāma uchak

shaiḳh kī mai-kade meñ kyūñke karāmāt rahe

dhajjiyāñ jaame kī kar dūñgā junūñ meñ ab ke

gar garebāñ-darī kā kaam mire haath rahe

ḳhaak kā putlā hai aadam jo koī achchhī kahe

ālam-e-ḳhāk meñ barsoñ ta.iiñ vo baat rahe

baat vaa.iz kī muassir ho diloñ meñ kyūñkar

din ko tāmāt rahe shab ko munājāt rahe

tang huuñ 'mīr' jī be-tāqatī-e-dil se bahut

kyūñke ye haath tale qibla-e-hājāt rahe

us suKHan-ras se agar shab ki mulaqat rahe

baat rah jae na ye din rahen nai raat rahe

faKHr se hum to kulah apni falak par phenken

us ke sag se jo mulaqat musawat rahe

mughbache le gae sajjada-o-ammama uchak

shaiKH ki mai-kade mein kyunke karamat rahe

dhajjiyan jame ki kar dunga junun mein ab ke

gar gareban-dari ka kaam mere hath rahe

KHak ka putla hai aadam jo koi achchhi kahe

aalam-e-KHak mein barson tain wo baat rahe

baat waiz ki muassir ho dilon mein kyunkar

din ko tamat rahe shab ko munajat rahe

tang hun 'mir' ji be-taqati-e-dil se bahut

kyunke ye hath tale qibla-e-hajat rahe