wo dil nahin raha hai tab jo uThaega

vo dil nahīñ rahā hai ta.ab jo uThā.egā

yā lohū ashk-e-ḳhūnī se muñh par bahā.egā

ab ye nazar paḌe hai ki bargashta vo mizha

kāvish karegī Tuk bhī to sañbhlā na jā.egā

khīñchā jo maiñ vo sā.ad-e-sīmīñ to kah uThā

bas bas kahīñ hameñ abhī sāhib ġhash aa.egā

rījhe to us ke taur pe majlis meñ shaiḳh jī

phir bhī milā to ḳhuub sā un ko rijhā.egā

jalve se us ke jal ke hue ḳhaak sang-o-ḳhisht

betāb dil bahut hai ye kyā taab lā.egā

ham rah chuke jo aise hī ġham meñ khapā kiye

mā'lūm jī kī chaal se hotā hī jā.egā

uḌ kar lage hai paañv meñ zulf us kī pechdār

baazī nahīñ ye saañp jo koī khilā.egā

uḌtī rahegī ḳhaak junūñ kartī dasht dasht

kuchh dast agar ye be-sar-o-sāmāñ bhī pā.egā

darpe hai ab vo saada qarāvul-pisar bahut

dekheñ to 'mīr' ke ta.iiñ koī bachā.egā

wo dil nahin raha hai tab jo uThaega

ya lohu ashk-e-KHuni se munh par bahaega

ab ye nazar paDe hai ki bargashta wo mizha

kawish karegi Tuk bhi to sanbhla na jaega

khincha jo main wo saad-e-simin to kah uTha

bas bas kahin hamein abhi sahib ghash aaega

rijhe to us ke taur pe majlis mein shaiKH ji

phir bhi mila to KHub sa un ko rijhaega

jalwe se us ke jal ke hue KHak sang-o-KHisht

betab dil bahut hai ye kya tab laega

hum rah chuke jo aise hi gham mein khapa kiye

ma'lum ji ki chaal se hota hi jaega

uD kar lage hai panw mein zulf us ki pechdar

bazi nahin ye sanp jo koi khilaega

uDti rahegi KHak junun karti dasht dasht

kuchh dast agar ye be-sar-o-saman bhi paega

darpe hai ab wo sada qarawul-pisar bahut

dekhen to 'mir' ke tain koi bachaega