wo kahan dhum jo dekhi gai chashm-e-tar se

vo kahāñ dhuum jo dekhī ga.ī chashm-e-tar se

abr kyā kyā uThe hangāme se kyā kyā barse

ho bar-afroḳhta vo but jo mai-e-ahmar se

aag nikle hai tamāshe ke ta.iiñ patthar se

Dhab kuchh achchhā nahīñ barham-zadan-e-mizhgāñ kā

kaaT Dālegā galā apnā koī ḳhanjar se

thā navishte meñ ki yuuñ suukh ke mariye us bin

ustuḳhvāñ tan pe numūdār haiñ sab mistar se

yuuñ to das gaz kī zabāñ ham bhī butāñ rakhte haiñ

baat ko tuul nahīñ dete ḳhudā ke Dar se

sair karne jo chale hai kabhū vo fitna-ḳhirām

shahr meñ shor-e-qayāmat uThe hai har ghar se

'ishq ke kūche meñ phir paañv nahīñ rakhne ke ham

ab ke Tal jaatī hai kalval ye agar sar par se

mehr kī us se tavaqqo' ġhalatī apnī thī

kahīñ dildārī huī bhī hai kisū dilbar se

kūcha-e-yār hai kyā turfa balā-ḳhez maqām

aate haiñ fitna-o-āshob chale ūdhar se

saath sonā jo gayā us kā bahut dil taḌpā

barsoñ phir 'mīr' ye pahlū na lage bistar se

wo kahan dhum jo dekhi gai chashm-e-tar se

abr kya kya uThe hangame se kya kya barse

ho bar-afroKHta wo but jo mai-e-ahmar se

aag nikle hai tamashe ke tain patthar se

Dhab kuchh achchha nahin barham-zadan-e-mizhgan ka

kaT Dalega gala apna koi KHanjar se

tha nawishte mein ki yun sukh ke mariye us bin

ustuKHwan tan pe numudar hain sab mistar se

yun to das gaz ki zaban hum bhi butan rakhte hain

baat ko tul nahin dete KHuda ke Dar se

sair karne jo chale hai kabhu wo fitna-KHiram

shahr mein shor-e-qayamat uThe hai har ghar se

'ishq ke kuche mein phir panw nahin rakhne ke hum

ab ke Tal jati hai kalwal ye agar sar par se

mehr ki us se tawaqqo' ghalati apni thi

kahin dildari hui bhi hai kisu dilbar se

kucha-e-yar hai kya turfa bala-KHez maqam

aate hain fitna-o-ashob chale udhar se

sath sona jo gaya us ka bahut dil taDpa

barson phir 'mir' ye pahlu na lage bistar se